აშშ-ის საელჩო საქართველოში ლტოლვილთა მსოფლიო დღეს განცხადებით ეხმაურება

პოლიტიკა - 16:45, 20 Jun, 2021

999

20 ივნისი არის დღე, როდესაც მსოფლიო აღნიშნავს მილიონობით ლტოლვილის სიმამაცესა და გამძლეობას და სოლიდარობას უცხადებს იძულებით გადაადგილებულ ადამიანებს, რომლებიც სხვადასხვა კონფლიქტების, ძალადობისა და დევნის გამო იძულებულნი გახდნენ დაეტოვებინათ თავიანთი სახლები, ახლობლები და უცხო ქვეყანაში ცხოვრება თავიდან დაეწყოთ.UNHCR-ის ცნობით, იმ ადამიანთა რაოდენობამ, ვინც ომის, ძალადობისა და ადამიანთა უფლებების დარღვევების გამო იძულებულებით გადაადგილებული პირი გახდა- რეკორდულ ნიშნულს, 82,4 მილიონს მიაღწია. ციფრების მიღმა დგას სახლიდან გამოძევებული ადამიანი, იძულებით გადაადგილების, ტანჯვისა და განსაცდელის ისტორია.

ამ თარიღს საქართველოში აშშ-ს საელჩო გამოეხმაურა:

"ასობით ათასი ქართველისთვის კარგად ნაცნობია საკუთარი სახლის იძულებით დატოვების ტკივილი. ლტოლვილთა საერთაშორისო დღეს, როდესაც პატივს მივაგებთ ლტოლვილებსა და იძულებით გადაადგილებულ ადამიანებს, შეერთებული შტატები მთელ მსოფლიოში მათთვის ჰუმანიტარული დაცვისა და დახმარების აღმოჩენის ერთგული რჩება.

მსოფლიო პანდემიის პირობებში ჩვენ განსაკუთრებული ყურადღება დავუთმეთ იძულებით გადაადგილებულ პირთა დახმარებას ისე, რომ მათთვის საფრთხე არ შეგვექმნა. 2020 წლის განმავლობაში შეერთებულმა შტატებმა $3 მილიონ დოლარზე მეტი ღირებულების დახმარება აღმოუჩინა ლტოლვილებს, თავშესაფრის მაძიებლებსა და კონფლიქტით დაზარალებულ მოსახლეობას საქართველოში."