სკანდალური ჩანაწერების საქმე - პროკურორი სატელეფონო საუბარს ფალსიფიკაციას უწოდებს, ბერამ კი თავის დროზე აღიარა ყველაფერი და თავიც იმართლა

პოლიტიკა - 14:12, 18 Jun, 2021

1997

გენერალურ პროკურატურაში ამ წუთებში პროკურორ ამირან გულუაშვილის ბრიფინგი იმართება, რომელიც ნოდარ მელაძის შაბათში გასულ სიუჟეტს უკავშირდება და ბერა ივანიშვილის, ირაკლი ღარიბაშვილისა და ანზორ ჩუბინიძის სატელეფონო ჩანაწერს მოიცავს.

გულუაშვილმა ტვ პირველზე გასულ სიუჟეტში სატელეფონო ჩანაწერს ფალსიფიკაცია უწოდა და აღნიშნა, რომ მონტაჟის შედეგად ბევრი რამ თავდაყირა აყენებდა საუბარს, თუმცა, ჩანაწერების გავრცელებიდან მალევე ბერამ აღიარა, რომ ასეთი ტიპის საუბარი შედგა და თავიც იმართლა - დედის გინებაზე თვალს ვერ დახუჭავდა.

გულუაშვილმა განმარტა, რომ წინა ხელისუფლების პირობებში ბიძინა ივანიშვილის ოჯახის წევრებზე ფარული მიყურადება აქტიურად ხორციელდებოდა, ჩანაწერების მონტაჟი კი საზოგადოების შეცდომაში შეყვანას ისახავდა მიზნად:

"მონტაჟის მიზნით, სპეციალური პროგრამების გამოყენებით, მათზე დადებულია სხვადასხვა აუდიო ჩანაწერიდან აღებული ფონი და რედაქტირების შემდეგ საბოლოოდ მიღებულია შეცვლილი შინაარსის მქონე აუდიო ჩანაწერები.

ბუნებრივია, რომ სატელევიზიო სიუჟეტის მომზადებისას, სხვადასხვა მიზნით, გარკვეული აუდიო თუ ვიდეო მასალა შესაძლოა დამზადდეს მონტაჟის გზით, ისე რომ არ იცვლებოდეს მისი რეალური შინაარსი. თუმცა, მოცემულ შემთხვევაში, აუდიო ჩანაწერების მონტაჟის შედეგად, შერჩევითი ფიქსაციის გზით, მიღებულია შეცვლილი შინაარსის მქონე სიტყვები და წინადადებები. მონტაჟის პროცესში, გამოყენებულია საუბრის მონაწილეთა მიერ სხვადასხვა დროსა და ვითარებაში წარმოთქმული წინადადებები, სიტყვები, ზოგ შემთხვევაში ბგერებიც კი. საერთო ჯამში, მონტაჟის ავტორთათვის სასურველი შინაარსის მქონე აუდიო ჩანაწერების მისაღებად, ჩანაწერებში, მონტაჟის კვალი აღინიშნება 170 ადგილას.
ექსპერტიზით დასტურდება, რომ აუდიო ჩანაწერებისთვის მეტი სიმძაფრის შესაძენად და საუბრებში სავარაუდო დანაშაულის ნიშნების ხელოვნურად შესაქმნელად, 21 ადგილას გამოყენებულია სხვა, უცნობ პირთა ხმები, რომლებიც არ ეკუთვნით ირაკლი ღარიბაშვილს, ბერა ივანიშვილს ან ანზორ ჩუბინიძეს" - განაცხადა გულუაშვილმა.

სკანდალური აუდიოჩანაწერების შესახებ სიუჟეტი ნახეთ აქ