დედაქალაქის მერიამ და თბილისის განვითარების ფონდმა დედაენის და 9 მარტის ბაღების, მშრალი და ზაარბრიუკენის ხიდების, ასევე, მათი მიმდებარე ტერიტორიის რესტავრაცია-რეაბილიტაციის პროექტი დაასრულეს.

კეთილმოწყობილი სივრცე დღეს, თბილისის მერმა კახა კალაძემ საქართველოს პრემიერ-მინისტრთან, ირაკლი ღარიბაშვილთან ერთად საზეიმოდ გახსნა.

პრემიერმა ცერემონიაზე სიტყვით გამოსვლისას აღნიშნა, რომ კახა კალაძემ დედაქალაქში ნამდვილად შემოიტანა ევროპული ხელწერა:

"კახამ ბოლო 4 წლის განმავლობაში დედაქალაქში ნამდვილად შემოიტანა ევროპული ხელწერა და ის სტანდარტი, რომელიც ნამდვილად არის ევროპული. მან თავისი შრომით და ნიჭიერებით ძალიან ბევრი რამ გააკეთა ჩვენს დედაქალაქში. ძალიან ბევრი პარკი, ბევრი სკვერი, ბევრი რეკრეაციული სივრცე მოაწყო და აჩუქა ჩვენს ქალაქს, მადლობა კახა! ბოლო წლების განმავლობაში თქვენ უყურებთ, თუ როგორ ვითარდება და ლამაზდება ჩვენი დედაქალაქი. ამაში პირადად კახის ხედვაა, მისი და მისი გუნდის უნარებია." - განაცხადა პრემიერმა.