კობახიძე დღეს ზუსტად ისევე "აფუჭებს" გახარიას, როგორც თავის დროზე ეკონომიკის მინისტრმა გახარიამ გამოუთხარა ძირი მაშინდელ შს მინისტრს და შემდეგ შს მინისტრმა გახარიამ, მაშინდელ პრემიერს

კობახიძე დღეს ზუსტად ისევე "აფუჭებს" გახარიას, როგორც თავის დროზე ეკონომიკის მინისტრმა გახარიამ გამოუთხარა ძირი მაშინდელ შს მინისტრს და შემდეგ შს მინისტრმა გახარიამ, მაშინდელ პრემიერს - ჭიჭინაძე

პოლიტიკა - 10:50, 16 Jun, 2021

1152

"ტრიბუნას" ლიდერი დავით ჭიჭინაძე ოქნების თავმჯდომარის პოსტიდან ირაკლი კობახიძის გადაყენებასა და მისი ღარიბაშვილით შესაძლო ჩანაცვლებას ეხმაურება და აცხადებს, რომ კობახიძე ახლა ცდილობს ივანიშვილს დაუმტკიცოს მისი ერთგულება. ჭიჭინაძის შეფასებით, გახარია იძულებული გახდა, 20 ივნისის მოვლენებზე პასუხისმგებლობა აეღო:

"წინასაარჩევნოდ კობახიძის ღარიბაშვილით ჩაანაცვლება რომ იგეგმება, ამაზე უკვე საუბარი დაწყებულია, ამიტომაც არის, რომ კობახიძე ყურშიც და ეთერებიდანაც მხოლოდ ბიძინა ივანიშვილს ესაუბრება. ცდილობს დაუმტკიცოს, რომ მისი ყურმოჭრილი მონაა, თორემ ქვეყანა და საზოგადოების აზრი მას არც არასოდეს აინტერესებდა.

კობახიძე ცრუობს, როდესაც ამბობს, რომ 20 ივნისს სროლის ბრძანება გახარიამ გასცა.

კობახიძე მაგ დროს ბაქოში იყო, მე გახარიასგან ერთი კიბის მოშორებით ვიდექი და ზუსტად მახსოვს ვინც აქტიურობდა იმ დროს... შესაბამისად ისიც ზუსტად ვიცი, რომ გახარია იძულებული გახდა პასუხისმგებლობა აეღო, თორემ ბრძანება მას ნამდვილად არ გაუცია.

ისე, კობახიძე დღეს ზუსტად ისევე „აფუჭებს“ გახარიას, როგორც თავის დროზე, ეკონომიკის მინისტრმა გახარიამ გამოუთხარა ძირი მაშინდელ შს მინისტრს და შემდეგ შს მინისტრმა გახარიამ, მაშინდელ პრემიერს.

მოკლედ, მეთოდები ერთნაირი აქვთ.

რეალობა და უბედურება კი ის არის, რომ გახარიას ყველა ოპერაცია კატასტროფა იყო, პრაქტიკულად ააფეთქა ყველაფერი, რასაც მიეკარა; კობახიძე - საშიში ქოსატყუილაა. მათ ინტრიგებს კი ქვეყანა, ადამიანები ეწირება" - აცხადებს ჭიჭინაძე.