ნინოწმინდის პანსიონთან დაკავშირებით შესაძლოა, პარლამენტის განათლებისა და მეცნიერების კომიტეტში საკომიტეტო მოსმენა გაიმართოს - საკითხი ოპოზიციონერმა დეპუტატმა, ფრაქცია „ლელო-პარტნიორობა საქართველოსთვის“ წევრმა სალომე სამადაშვილმა დასვა.

"ვფიქრობ, კომიტეტმა უახლოეს მომავალში უნდა ჩანიშნოს მოსმენა, რაც შეეხება ნინოწმინდის პასნიონატში შექმნილ ვითარებას და ზოგადად, ამ მიმართულებით რა ვითარება გვაქვს. ვფიქრობ, საზოგადოებისთვის ეს ძალიან მნიშვნელოვანი საკითხია. კარგი იქნებოდა კომიტეტის სპეციალური სხდომა მოგვეწვია, რომ ამ საკითხში ძალიან საფუძვლიანად ჩაგვეხედა, ყველა ასპექტი შეგვესწავლა კომიტეტის სხდომის ფარგლებში. თუ გნებავთ ოფიციალურად შემიძლია მოგმართოთ წერილობითი წინადადებით“, - განაცხადა სალომე სამადაშვილმა.

სამადაშვილის ამ წინადადებას კომიტეტის თავმჯდომარის მოადგილემ, "ქართული ოცნების“ დეპუტატმა გიორგი ამილახვარმა უპასუხა და განაცხადა, რომ თუ კომიტეტის წევრები მზაობას გამოთქვამენ, საკითხზე მსჯელობის გამართვა იქნება შესაძლებელი:

"ნინოწმინდის საკითხში პირველივე დღიდან განათლების და მეცნიერების სამინისტრო, კომიტეტის თავმჯდომარე, ასევე ბექა დავითულიანი აქტიურად არიან ჩართულები. ვფიქრობ, ამ საკითხზე ჩვენ შეგვიძლია ვიმსჯელოთ და გავაკეთოთ ეს მოსმენა, თუ კომიტეტის წევრებიც თანახმა იქნებიან. ნამდვილად მნიშვნელოვანი საკითხი, თუმცა, კომიტეტი ამ საკითხებში თავიდან ბოლომდეა ჩართული“, - განაცხადა ამილახვარმა.