საოკუპაციო რეჟიმის ტყვეობაში მყოფი ზაზა გახელაძის ოჯახის ინფორმაციით, პრემიერი ღარიბაშვილი დაჰპირდა მათ, რომ ოკუპანტების მიერ ერთი წლის წინ გატაცებულ გახელაძეს თვის ბოლოს გაათავისუფლებდნენ. თუმცა, როგორც ისინი აცხადებენ, თვე დამთავრდა და ზაზა ისევ პატიმრობაშია.

გახელაძის დედა პრემიერს ვადას 23 ივნისამდე აძლევს და განმარტავს, რომ მისი ვაჟის დაბადების დღე სწორედ 23 ივნისაა, მას კი არ უნდა შვილი იუბილეს ოკუპანტების ტყვეობაში შეხვდეს, წინააღმდეგ შემთხვევაში ოჯახი საპროტესტო აქციეებს აანონსებს:

"პირადად ღარიბაშვილი დაგვპირდა, თვის ბოლომდე გამოუშვებენ ჩვენს შვილს, მაგრამ არც მაგან გაამართლა და მოგვატყუა ისევ. 23-ში ჩემს შვილს დაბადების დღე აქვს, ჩვენ ესეც ვუთხარით ღარიბაშვილს, რომ თვის ბოლოს თუ არა 23-ში დაბადების დღე აქვს, 33 წლის გაიტაცეს და 34 წელს იქ ნუ შეახვედრებთ ჩემ შვილს. თუ არც ამ თხოვნამ არ გაჭრა 23-ში სახლში აღარ გავჩერდებით. დავგეგმავთ აქცია იქნება, თუ რამე სხვა, არ ვიცი რა იქნება, მაგრამ სახლში ნამდვილად არ გავჩერდებით და ფეხით ჩავალთ ცხინვალის ციხეში", - აცხადებს გახელაძის დედა ნანა ბუნტური.

შეგახსენებთ, ზაზა გახელაძე რუსმა სამხედროებმა 11 ივლისს გაიტაცეს, საოკუპაციო რეჟიმმა 18 ივლისს საქართველოს მოქალაქეზე განცხადება გაავრცელა, სადაც აღნიშნულია, რომ ზაზა გახელაძე დაკავებულია და კარანტინშია გადაყვანილი.

მას ცხინვალის ე.წ. სასამართლომ თავისუფლების აღკვეთა 12 წლითა და 6 თვით მიუსაჯა.