საქართველოში რამდენიმე რელიგიური ორგანიზაციიდან დაფინანსებას სახელმწიფო ბიუჯეტიდან მხოლოდ მართმადიდებლური ეკლესია იღებს, კანონმდებლობის მიხედვით კი, სახელმწიფო ვალდებულია რელიგიურ ორგანიზაციებს ხელი შეუწყოს არსებობაში, რაც გულისხმობს საჭიროების შემთხვევაში, ფინანსურ დახმარებასაც.

შესაბამის უწებებში აცხადებენ, რომ დაფინანსებას მხოლოდ მართლმადდებელი ეპარქიები ითხოვენ და გახარჯული თანხების აღრიცხვის დოკუმენტის მიწოდება შესაბამისი უწყებებისთვის ხშირ შემთხვევაში, პრობლემაა.

„გურია ნიუსმა“ ოზურგეთის მუნიციპალიტეტის ფგამგეობიდან გამოითხოვა დოკუმენტაცია, თუ რა ოდენობის თანხა გამოეყო ეპარქიას 2007 წლიდან დღემდე. გამგეობიდან მათ მიიღეს მხოლოდ გაცემული თანხების დამადასტურებელი საბუთი, ხოლო დოკუმენტი, თუ რაში დაიხარჯა გაცემული თანხები, წარმოდგენილი არ არის.

,,წლის დასაწყისში მეუფე გვწერს, თუ რა რაოდენობის თანხა სჭირდება, ისე ვსვამთ ბიუჯეტში.“- აცხადებს ჩოხატაურის მუნიციპალიტეტის გამგეობის საფინანსო სამსახურის უფროსი ზურაბ ჩანტლაძე გამოცემასთან საუბრისას.

ამ დოკუმენტების თანახმად, ოზურგეთის გამგეობის ბიუჯეტიდან შემოქმედის ეპარქიას 2007 წელს 17 ათასი ლარი ჩაერიცხა , 2008 წელს -102 ათას 100 ლარი, 2009 წელს -81 ათასი ლარი, 2010 წელს-63 800 ლარი, 2011 -60 ათასი ლარი, 2012 წელს- 55 ათასი, 2013 წელს- 45 ათასი ლარი.

ამას გარდა, „გურია ნიუსმა“ გაარკვია, რომ თანხა სასულიერო პირების პირად ანგარიშებზეც ირიცხებოდა:

"2010 წელს მამა ანდრიას პირად ანგარიშზე ჩარიცხული თანხის ოდენობა, გამგეობის მიერ მოწოდებული ბრძანებების თანახმად, 20 000 ლარს სცილდება. მიმდინარე წელს ზაზა ურუშაძის N588 ბრძანების თანახმად "რელიგიის მხარდაჭერისთვის გამოყოფილი ასიგნებებიდან" 1 999 ლარი წმინდა გიორგის ტაძრის მშენებლობასთან დაკავშირებით ფიზიკური პირის - ზაზა ჟღნეტის (მამა საბა) ანგარიშზე გადაირიცხა. ბოლო წლების დოკუმენტაციის თანახმად, მამა საბას პირად ანგარიშებზეც სოლიდური თანხებია გადარიცხული", - წერს გამოცემა.

ეპაქიაში კი განმარტავენ, რომ მათ ყველა დოკუმენტი წესრიგში აქვთ და თანხა ეკლესია-მონასტრების რეაბილიტაციას ხმარდებოდა და ხმარდება. გამოცემის ცნობით, სხვა მოქმედ რელიგიურ ორგანიზაციებს არასოდეს მიუმართავთ თანხის ჩარიცხვის თხოვნით ადგილობრივი გამგეობისთვის, თუმცა როგორც გამგეობაში აცხადებენ, მათ ამის უფლება აქვთ და თუ წლის დასაწყისში სხვებიც მიმართავენ თანხას აუცილებლად გამოუყოფენ.გარდა ამისა, გაცემული თანხისა და ბიუჯეტში ამ მიმართულებით გამოყოფილი თანხების ოდენობა ხშირ შემთხვევაში არ ემთხვევა ერთმანეთს. ოზურგეთის გამგეობამ ,,გურია ნიუსს“ ვერ მიაწოდა დოკუმენტაცია, თუ რაში დაიხარჯა გადარიცხული თანხები.

მომზადებულია "გურია ნიუსის" სტატიის მიხედვით