მიუსაფართა თავშესაფარი მოსკოვის გამზირზე, მიუსაფართა პრობლემების მოგვარებაზე მომუშავე უწყებათშორისი კომისიის გადაწყვეტილებით, 11 დეკემბერს გაიხსნა და პირველი ბინადრებიც იმავე დღეს მიიღო. დღეისთვის თავშესაფარში დადგმულ 15 კარავში 156 ადამიანი ათევს ღამეს. მათ შორის ორი ოჯახია, ერთი - 2, მეორე კი 5-შვილიანი.

თავშესაფარში მყოფ ადამიანებს სახელმწიფო ცხელი საკვებითა და სამედიცინო მომსახურებით უზრუნველჰყოფს. მათ დასახმარებლად აქტიურობენ სახელმწიფო თუ კერძო ორგანიზაციები, მოქალაქეები. როგორც საქართველოს რეგიონული განვითარებისა და ინფრასტრუქტურის სამინისტროში, ისე - თავშესაფარში, მიუსაფართათვის დახმარება უკვე მიიტანა 60-მდე სამოქალაქო პირმა და 10-მდე ორგანიზაციამ. დახმარებაში შედის, როგორც საკვები, ისე - თბილი ტანსაცმელი.

კარვები მიუსაფართა დასახმარებლად, მიუსაფართა პრობლემების მოგვარებაზე მომუშავე უწყებათშორისი კომისიის გადაწყვეტილებით, დაიდგა ქუთაისსა და ბათუმშიც. ქუთაისში, სპორტის სასახლის მიმდებარე ტერიტორიაზე ორი კარავი გაიშალა. დღეს იქ 3 ადამიანია. მათ გათბობასა და ცხელი საკვებით უზრუნველყოფას სახელმწიფო ახორციელებს. ერთი კარავი გაიშალა ბათუმში, სადაც 100-მდე ადამიანი თბება და ცხელ საკვებს იღებს.

მიუსაფართა პრობლემების მოგვარებაზე მომუშავე უწყებათშორისი კომისია, ამინდის გაუარესებისა და ტემპერატურის მკვეთრი ვარდნის გამო, საქართველოს პრემიერ-მინისტრის გადაწყვეტილებით, 10 დეკემბერს შეიქმნა. კომისიას საქართველოს რეგიონული განვითარებისა და ინფრასტრუქტურის მინისტრი, დავით ნარმანია ხელმძღვანელობს.