ფრაქცია „შარლ მიშელის რეფორმის ჯგუფის“ თავმჯდომარემ ხათუნა სამნიძემ პარლამენტის პლენარულ სხდომაზე მმართველი გუნდის წევრების მიმართა და შეახსენა დოკუმენტში მითითებული ვალდებულებები შეასრულონ, ნაცვლად იმისა, რომ ოპოზიციისკენ გაიშვირონ ხელი და ზღვარგადასული განცხადებები აკეთონ:

„როცა თითს ოპოზიციისკენ იშვერთ, გაიხსენეთ, როგორ გაგიჭირდათ შარლ მიშელის დოკუმენტზე ხელის მოწერა - პარლამენტში „ნაციონალური მოძრაობის“ შესვლის შემდეგ არაადეკვატური, ზღვარგადასული, ემოციური განცხადებების კეთების ნაცვლად, დაფიქრდით, რა წერია დოკუმენტში და რა ვალდებულებები გვაქვს აღებული. როგორც ჩანს, პარლამენტში „ნაციონალური მოძრაობის“ შემოსვლასთან დაკავშირებით ტექსტები წინასწარ მოამზადეთ. ცინიზმს ჩვენ გვაბრალებთ, მაგრამ ყველა განცხადებაში ცდილობთ ცინიკურად გამოეხმაუროთ იმას, რასაც ამდენი თვეა ჩვენი დასავლელი პარტნიორები ცდილობენ. პირველ რიგში, მათი დაუღალავი შრომის შედეგია, რომ შარლ მიშელის დოკუმენტი არსებობს და არის ვითარება, როცა პარლამენტმა სრულფასოვანი მუშაობა უნდა დაიწყოს. ძალიან ცუდია, როცა ამ განცხადებებს წინასწარ ამზადებდით და არც ერთი თქვენგანისგან არ მომისმენია მზაობა, მოწოდება და აუცილებლობა იმის თაობაზე, რომ შარლ მიშელის დოკუმენტის შესაბამისად ერთად ვიმუშაოთ იმ პრობლემებსა და რეფორმებზე, რაზეც ვალდებულება აიღეთ და იძულებული გახდით, რომ ხელი მოგეწერათ“, - მიმართა სამნიძემ ოცნების წევრებს.