გზების გასაწმენდად აჭარაში დამატებითი ტექნიკა შეიყვანეს

საზოგადოება - 15:07, 17 Dec, 2013

1746

გუშინ კრიზისების მართვის დროებითი შტაბის სხდომაზე აჭარის რეგიონში უამინდობის გამო შექმნილი პრობლემების გადაჭრის სამოქმედო გეგმა შემუშავდა. გეგმის თანახმად, დღეს აჭარაში შემოყვანილია დამატებითი ტექნიკა, რომლის მეშვეობით გზების უფრო სწრაფად და ეფექტიანად გაწმენდა მოხერხდება.

რეგიონული განვითარებისა და ინფრასტრუქტურის მინისტრის მოადგილე გიორგი ამაშუკელი აცხადებს, რომ „შტაბის სხდომაზე გუშინ შემუშავებული გეგმის თანახმად, დღეისათვის მოვახერხეთ და შემოვიყვანეთ აჭარის ტერიტორიაზე დამატებითი მძიმე ტექნიკა, რომლითაც მოხერხდება სასოფლო-სამეურნეო გზების უფრო შემჭიდროვებულ ვადებში გასუფთავება. შესაბამისად, ამჟამად ვიმყოფებით ამ ტექნიკის ერთ-ერთ ლოკაციის ადგილზე, სადაც მემანქანეებმა უკვე მიიღეს კონკრეტული მითითებები და შედგენილი იქნა კონკრეტული გეგმა-გრაფიკი და უახლოეს წუთებში მოხდება ტექნიკის გადასროლა უკვე კონკრეტულ სასოფლო-სამეურნეო გზებზე“.

არჩილ ხაბაძე, აჭარის მთავრობის თავმჯდომარე: „შტაბის გადაწყვეტილებით, მიღებული იქნა გადაწყვეტილება, რომ ქობულეთისა და ხელვაჩაურის რაიონში ყველა სოფელი იქნას გაწმენდილი თოვლისგან, შესაბამისად ამ ეტაპზე არსებული რესურსებით ჯამში ტექნიკის 35 ერთეული მუშაობს, ჩვენ კიდევ დავამატეთ ქობულეთის რაიონში დაახლოებით 7 ერთეული, ხოლო ხელვაჩაურის რაიონში დაახლოებით 10მდე. ამ ეტაპზე მობილიზებულია კვირიკის გადასახვევთან ტექნიკა და იქნება გაშვებული ყველა მიმართულებით, რაც მოგვცემს საშუალებას დღის ბოლომდე, 17 რიცხვის დასრულებამდე ყველა სოფელი იქნას გაწმენდილი“.