მას შემდეგ, რაც "ქართული ოცნების" თავმჯდომარემ ირაკლი კობახიძემ გახარია სახელმწიფო გადატრიალების მცდელობაში დაადანაშაულა, ექსპრემიერის გუნდმა პროკურატურას მიმართა და კობახიძის მძიმე ბრალდებაზე გამოძიების დაწყება მოითხოვა.

კობახიძე დღესაც ამტკიცებს, რომ გახარიას გადადგომა გუნდის ღალატია და ივანიშვილის გუშინდელი განცხადება კიდევ უფრო მეტად ცხადყოფს იმ ფაქტს, რომ ის პოლიტიკიდან წასული ოლიგარქის პროექტი არ არის, რაც შეეხება კითხვას, მივა თუ არა კობახიძე პროკურატურაში ჩვენების მისაცემად, ოცნების თავმჯდომარემ განმარტა, რომ თუ გამოძიებას კითხვები ექნება, ის გახარიას წინააღმდეგ ჩვენებას მისცემს:

"გაცხადდა რომ გახარია არ არის არც ოცნების პროექტი, არც ივანიშვილის პროექტი და ამით მგონი გაცხადდა ისიც, რომ გახარია არის სხვა ვინმეს ან სხვა რამის პროექტი.

რაც შეეხება შეფასებას - ეს იყო რა თქმა უნდა გუნდის ღალატი და უფრო მეტიც, როგორც ეს ითქვა ბიძინა ივანიშვილის განცხადებაშიც, ეს იყო სახელმწიფოს წინააღმდეგ გადადგმული ნაბიჯი და ეს შეიძლება პოლიტიკურად შეფასდეს, როგორც სახელმწიფოს პირდაპირი ღალატი.

გამოძიება არის სამართალდამცავი ორგანოების ფუნქცია. თუ რაიმე კითხვა იქნება, ყველა კითხვას გაეცემა პასუხი", - განაცხადა კობახიძემ.