ფრაქცია "ლელოს" წევრმა სალომე სამადაშვილმა ამნისტიის კანონპროექტზე ისაუბრა, რომელსაც დღეს პარლამენტში მეორე მოსმენით განიხილავენ. სამადაშვილის თქმით, ამნისტიის კანონპროექტში ორი საკითხი პრინციპულად მნიშვნელოვანია - ნიკა მელიას სისხლისსამართლებრივი დევნის შეწყვეტა და კანონპროექტის გავრცელება კონკრეტულ მუხლებზე:

"პირველი - როგორ იქნება კანონპროექტში ასახული ნიკა მელიას საქმესთან მიმართებით. ამნისტიის იდეა მედიატორების მიერ იმისთვის იყო შემოთავაზებული, რომ დაიხუროს ნიკა მელიას წინააღმდეგ მიმდინარე სისხლის სამართლის საქმე. ამიტომ, თუ ამნისტიის კანონპროექტი მიღებული იქნება იმგვარად, რომ ეს კანონპროექტი ნიკა მელიას არ შეეხოს, ეს ეწინააღმდეგება მიშელის შეთანხმების სულისკვეთებას. ამის შესახებ “ქართული ოცნების” წარმომადგენლები გააფრთხილეს, მათ შორის სტარტეგიულმა მოკავშირეებმა, სახელმწიფო დეპარტამენტის დელეგაციამ, რომელიც საქართველოში გუშინ იმყოფებოდა და ვნახოთ, საბოლოოდ როგორ ჩამოყალიბდება მათი პოზიცია.

რაც შეეხება სხვა საკითხებს, ჩვენი პოზიციაა, რომ ამნისტია უნდა შეეხოს არა ფაქტს, არამედ კონკრეტულ დანაშაულებს და მუხლებს. ამასთან მიმართებით ჩვენ გვაქვს აზრთა სხვადსხვაობა და ჩვენი პოზიცია ასახულია იმ კანონპროექტში, რომელიც პარლმენტში წავადგინეთ”, - განაცხადა სამადაშვილმა.