კულტურის მინისტრი თეა წულუკიანი ბიძინა ივანიშვილის მიერ დღეს გავრცელებულ განცხადებას გამოეხმაურა და აღნიშნა, რომ გახარიას ახალმა გუნდმა პოლიტიკიდან წასული ოლიგარქი იქამდე მიიყვანა, რომ იძულებული გახდა, განცხადება გაეკეთებინა და ექსპრემიერთან მისი სახელის დაკავშირება დაუშვებლად ეცნო. წულუკიანის შეფასებით, ლიდერმა, რომელიც რთულ დროს მათთან უნდა ყოფილიყო, ისინი მიატოვა:

"საქმე წავიდა ისე, რომ გიორგი გახარიას გუნდის წევრებმა, არაერთი მათგანის ქმედებების შესახებ არსებობს ინფორმაცია, ეს ბევრმა თქვენგანმაც ალბათ იცის, რომ ისინი თავად ავრცელებდნენ ხმას სხვადასხვა პარტიულ აქტივში, სხვადასხვა რეგიონში, განსაკუთრებით ზოგიერთ მათგანში, რომ ისინი იყვნენ მხარდაჭერილი ქართული ოცნების და პირადად ბიძინა ივანიშვილის მიერ. რა თქმა უნდა, ჩვენ ვიცოდით, რომ ეს იყო სიცრუე მაგრამ როგორც ჩანს ამგვარმა ქმედებამ მიიყვანა ბიძინა ივანიშვილი იქამდე, რომ ეს პოლიტიკიდან წასული კაცი დღეს გამოდის და ამბობს, რომ მისი სახელის გამოყენება არის დაუშვებელი. მართლაც, მისი სახელის გამოყენება ჩვენთვისაც არის დაუშვებელი.

მეც დამრჩა განცდა, რომ ლიდერმა უბრალოდ აიღო და ჩვენ გაგვყარა ასე და მიგვატოვა, მაშინ როდესაც კანონი იყო დასაცავი. შესაბამისად, ყველაფერს უნდა დაერქვას თავისი სახელი, გუნდის ლიდერი, როდესაც არის რთული მომენტები გუნდისთვის, ან რთული გადაწყვეტილება მისაღები, რაც არ უნდა ეს გადაწყვეტილება ყოფილიყო ერთადერთი და სწორი... ის უნდა იყოს გუნდის გვერდით, სწორედ ამას ჰქვია ლიდერი", - განაცხადა წულუკიანმა.