მელიას საქმის დღევანდელ პროცესზე ბრალდების მხარემ თავისი გასაიდუმლოებული "ოქროს მოწმე" დაკითხა, რომელიც სამთავრობო ტელეარხ "პოსტივის" ჟურნალისტი ნათია ბერიძეა. ის მანამდე არა ერთ საქმეში ფიგურირებს "ოცნების" სასარგებლოდ.

ბერიძის თქმით, მან თავად მოისმინა, როგორ გეგმავდა ნიკა მელია "რევოლუციის" მოწყობას.

სამთავრობო არხის ჟურნალისტი დაცვის მხარის კითხვებმა გააღიზიანა, რომელიც ფეისბუქ-გვერდების ადმინისტრატორობას შეეხებოდა - ბერიძე იყო "ბიძინა ივანიშვილი ჩვენი თანამოქალაქეა" გვერდის ადმინისტრატორი, შემდეგ კი ყალბი ინფორმაციის გავრცელების გამო ფეისბუქ-ადმინისტრაციამ დაბლოკა.

20 ივნისის მოვლენების დროს ის წარმოადგენდა კოკა ყანდიაშვილის სააგენტოს, რომელიც ასევე მხილებულია ყალბი ინფორმაციის გავრცელებაში.

ბერიძეს 20 ივნისის ღამეს უწყვეტი მასალა აქვს გადაღებული საკუთარი ტელეფონით და მიუხედავად იმისა, რომ თავად ამტკიცებს, მელიას გეგმების შესახებ როგორ გაიგო, მასალაში არ ისმის მოწოდება რევოლუციური გადატრიალების შესახებ.