"ლელოს" ლიდერმა ბადრი ჯაფარიძემ "პალიტრანიუსის" ეთერში 2018 წელს, საპრეზიდენტო არჩევნების წინ მუქარის წერილის მიღების დეტალებზე ისაუბრა და განაცხადა, რომ აღნიშნული წერილი გიორგი გახარიამ პირადად გადასცა.

ჯაფარიძემ მოუწოდა ყოფილ პრემიერს, ეყოს გამბედაობა და აღიაროს აღნიშნული ფაქტი:

"ამ ეტაპზე მხოლოდ ტყუილს ვხედავ. თუკი დავინახავ, რომ გიორგი გახარია გულწრფელად იტყვის, რატომ გადმომცა ის წერილი, რომელიც თქვენთვის ცნობილია, რატომ გააჩერა ანაკლიის პროექტი…

კი, კი, მან პირადად გადმომცა. მან გადმომცა ეს წერილი, ვამბობ ამას სრული პასუხისმგებლობით. ძალიან ცუდია, რომ გაბედულება აკლია, თქვას, რომ დაუშვა შეცდომა, მაგრამ უნდა თქვას, ვინ დაავალა ამ წერილის გადმოცემა...

ჩვენ რომ გვყავდეს დამოუკიდებელი პროკურატურა, რა თქმა უნდა, დაადგენდა, ვისი თითის ანაბეჭდებია ამ წერილზე. საბოლოოდ ხომ გვსურს, საზოგადოებამ სიმართლე იცოდეს. სიმართლე არის ერთი, ეს მუქარის წერილი იყო მისგან ჩემზე პირადად გადმოცემული. მას უნდა ეყოს გამბედაობა, ეს საზოგადოებას უთხრას. ჩემი აზრით, ეს იქნება ძალიან მნიშვნელოვანი ნაბიჯი მისი მხრიდან", - განაცხადა ჯაფარიძემ "პალიტრანიუსის" ეთერში.