ენმ ხელისუფლებას მოუწოდებს მიიღონ ზომები ნინოწმინდის ბავშვთა პანსიონატის გარშემო მიმდინარე პროცესებზე

პოლიტიკა - 12:56, 03 Jun, 2021

1108

"ერთიანი ნაციონალური მოძრაობა" ყველა უწყებასა და პირს, რომლის პირდაპირ მოვალეობაშია ბავშვზე ზრუნვა, მოუწოდებს დაინტერესდეს და მიიღოს შესაბამისი ზომები ნინოწმინდის პანსიონატის გარშემო მიმდინარე პროცესებზე.
როგორც დღეს გამართულ ბრიფინგზე პარტიის ერთ-ერთმა ლიდერმა ხატია დეკანოიძემ განაცხადა, სახელმწიფოს მოვალეობაა ბავშვების უსაფრთხოება დაიცვას.

"ვეხმაურებით სახელმწიფოს გულგრილობას და ამით ჩადენილ დანაშაულს, რომელიც ნინოწმინდის ბავშვთა პანსიონატს ეხება. უკანასკნელი 5 წლის განმავლობაში, პროკურატურას ბავშვებზე ძალადობასა და გაუპატიურებაზე საქმეები აქვს აღძრული და სახელმწიფო არის გულგრილი, უწყებებმა ვერ დაადგინეს ის, თუ რა ხდება ბავშვთა სახლში. წარმოუდგენელია ამ მოცემულებით ვინმე გულგრილო დარჩეს. სახელმწიფოს განგაშის ზარი უნდა ჩამოეკრა, მაგრამ მივიღეთ საპირისპირო - სახალხო დამცველს უკრძალავენ დაადგინოს რა ხდება, რა გარემოებებთან გვაქვს საქმე. ეს გულგრილობა ახალისებს ძალადობას.
მოვუწოდებთ ხელისუფლებას, პრემიერს, შინაგან საქმეთა სამინისტროს, გენერალურ პროკურატურას, განათლების სამინისტროს და ყველას, რომლისთვისაც აუცილებელი უნდა იყოს ბავშვებზე ზრუნვა, მიიღონ სასწრაფოდ ზომები, რათა ეს გულგრილობა არ გადაითარგმნოს ბავშვებზე ძალადობაზე.
სახელწმიფომ არაფერი გააკეთა იმისთვის, რომ ბავშვები დაეცვა. ჩვენ, ჩვენის მხრივ გავაკეთებთ ყვლაფერს რის საშუალებასაც მანდატი გვაძლევს. პარლამენტში ყველა უწყების პირველ პირს მოვთხოვთ პასუხს, ავტეხთ განგაშს თუ რატომ არ იღებს ხმას სახელმწიფო. ესაა ბრძოლა და ჩვენ უნდა გავაკეთოთ ყველაფერი რომ ბავშვები დავიცვათ" - განაცხადა დეკანოიძემ.