ანტისაოკუპაციო მოძრაობის ლიდერი დავით ქაცარავა სოციალურ ქსელში დრონით გადაღებულ კადრებს ავრცელებს, რომელშიც საოკუპაციო ხაზთან არსებული ვითარება და რუსი სამხედროების მოქმედებები ჩანს.

როგორც ქაცარავა წერს, ხურვალეთის სასაფლაოსთან ოკუპანტების მოქმედებები მობილური საგუშაგოს მოწყობის მცდელობას ჰგავდა, ეს ფაქტი კი იმის მანიშნებელია, რომ ამ რადიოსადგურების განთავსებით რუს სამხედროებს შეეძლებათ ნებისმიერი ინფორმაციის მიღება, მათ შორის ქართული სპეცსამსახურებისა და ძალოვანი უწყებების სატელეფონო საუბის მოსმენაც:

"გუშინ, ხურვალეთში დრონით მონიტორინგის დროს დავაფიქსირეთ რუსორკების უცნაური მოქმედებები, რომლებიც პირველი შეხედვიდან მივიჩნიეთ მობილური საგუშაგოს მოწყობის მცდელობად.

ხურვალეთიდან გამოსვლისას დავაფიქსირეთ ევროკავშირის მისიის მანქანების უპრეცენდენტოდ დიდი რაოდენობა, რამაც დაგვაფიქრა იმაზე, რომ საქმე ბევრად მნიშვნელოვან რამესთან გვქონდა, ვიდრე საგუშაგოს კეთილმოწყობის მოქმედებებთან.

ასეც აღმოჩნდა.

გუშინ ოკუპანტებს მასშტაბური წვრთნები ჰქონდათ გამართული კავშირგაბმულობის რადიოტრენინგის კუთხით, რაშიც ხურვალეთის მიმდებარედ ხელი შეეშალათ ჩვენი სამოქალაქო დრონის გამოჩენით.

რაც ძალზედ საინტერესოა, სამოქალაქო დრონის გამოჩენა ჩათვალეს "ინციდენტად" და გამოიძახეს ევროკავშირის წარმომადგენლები.

ჩვენმა ხელისუფლებამ კი იუხერხულა ეს "ინციდენტი" და კვლავ არაფერი შეიმჩნია..." - წერს ქაცარავა სოციალურ ქსელში.