"ქართული ოცნების" წევრი, შალვა პაპუაშვილი , ეხმაურება "ნაციონალური მოძრაობის“ გადაწყვეტილებას, შარლ მიშელის შეთანხმების დოკუმენტზე ხელმოწერის გარეშე საკანონმდებლო ორგანოში შესვლასთან დაკავშირებით , და აცხადებს, რომ "თუ ისინი არ აწერენ ხელს, თვითონაც არ ავწევენ ხელს".

მისივე თქმით, "ნაციონალური მოძრაობა“ 19 აპრილის შეთანხმებიდან გამომდინარე შედეგებს ამ შეთანხმებაზე ხელმოწერის გარეშე ვერ მიიღებს.

"ჩვენ ხაზგასმით ვამბობდით, რომ „ნაციონალურ მოძრაობას“ ჰქონდა ორი გზა დარჩენილი - ცუდი და უარესი. შესაბამისად, არც ეს გზა არის მისთვის კარგი, რაც აირჩიეს - შემოდიან პარლამენტში ისე, რომ შთანხმებას ხელს არ აწერენ. ამით აღიარებენ საკუთარ მარცხს, მეორე მხრივ, თითქოს არ ურიგდებიან ამ მარცხს. გარწმუნებთ, 19 აპრილის შეთანხმებასაც საბოლოო ჯამში ხელს მოაწერენ და ამ სიტყვასაც ისევე გატეხენ, როგორც სხვა დანარჩენი გატეხეს. მათ აქვთ მანდატი და შეუძლიათ რეგლამენტით გათვალისწინებული ყველა ინსტრუმენტით ისარგებლონ - იქნებიან კომიტეტის წევრები, შესაბამისად, დაესწრებიან სხდომებს. რაც შეეხება 19 აპრილის შეთანხმებიდან კონკრეტულად გამომდინარე შედეგებს, ამ შედეგებს ვერ მიიღებს ვერავინ, ვინც არ არის შეთანხმების მონაწილე. თუ ისინი არ აწერენ ხელს, ჩვენ არ ავწევთ ხელს“, - განაცხადა პაპუაშვილმა.