თავდაცვის სამინისტრომ Facebook-ის გვერდზე გამოაქვეყნა განცხადება, რომელშიც ტელეკომპანია "მთავარ არხს" სიცრუეში ადანაშაულებს. საქმე ეხება არხზე გასულ სიუჟეტს თავდაცვის მინისტრის ჯუანშერ ბურჭულაძის ქონების შესახებ. როგორც უწყების განცხადებაში წერია, ტელეკომპანიის მიერ ტირაჟირებული სიცრუე რეაგირების გარეშე არ დარჩება:

"მიმდინარე წლის 29 მაისს ტელეკომპანია მთავარის გადაცემა „შაბათის მთავარში“ გაკეთდა რეპორტაჟი თავდაცვის მინისტრის ქონებრივი დეკლარაციისა და შემოსავლების შესახებ. გადაცემა თავდაცვის მინისტრის მიმართ თავისი ცილისმწამებლური და შეთითხნილი ბრალდებებით გასცდა ყოველგვარ ეთიკურ და სამართლებრივ საზღვრებს.

კერძოდ, ტელეკომპანია მთავარის სიუჟეტში, სხვა პირების კუთვნილი ქონება მიაწერეს თავდაცვის მინისტრს. ასევე, მისი საცხოვრებელი სახლი წარმოაჩინეს ისეთი ფორმით, თითქოსდა რამდენიმე სახლს წარმოადგენდა.

ტელეკომპანია მთავარის ვებგვერდმა დაამახინჯა ინფორმაცია ჯუანშერ ბურჭულაძის თავდაცვის მინისტრის მოადგილეობის პერიოდში აღებული ხელფასის შესახებ. შეგნებულად დამახინჯდა არაერთი ფაქტი.

თავდაცვის მინისტრს მიაწერეს არარსებული ქონება და შემოსავლები და ამ მეთოდებით შეეცადნენ მისი რეპუტაციის შელახვას.

არც ფალიაშვილის და არც ლუბლიანას ქუჩაზე, არც მას და არც მის ოჯახის წევრებს არ გააჩნიათ არანაირი უძრავი ქონება, ხოლო ის უძრავი ქონება, რომელიც მინისტრს გააჩნია ყველაფერი შეძენილი აქვს საჯარო სამსახურში მაღალ თანამდებობაზე მოღვაწეობამდე.

აღნიშნულის დასადასტურებლად, მინისტრმა პირადი განცხადებით მიმართა საჯარო სამსახურის ეროვნულ ბიუროს, რათა დაედასტურებინათ აღნიშნული ფაქტები. ბიუროდან მიღებული ინფორმაციით დადასტურდა, რომ სიუჟეტში მოყვანილი ინფორმაცია არის სიცრუე. აღნიშნულ ცილისწამებასთან და სიცრუესთან დაკავშირებით მინისტრი აპირებს, მიმართოს სასამართლოს.

​მომავალში, მედიასაშუალებების მიერ გაჟღერებული არცერთი ამდაგვარი, ტოტალური სიცრუე არ დარჩება სამართლებრივი რეაგირების გარეშე" - წერია განცხადებაში.