ბოლო დღეების განმავლობაში გახარიას პოლიტიკურ ასპარეზზე შემოსვლას განსაკუთრებულად აქტიურად განიხილავენ, რადგან ყოფილი პრემიერის გუნდის პრეზენტაციამდე ერთი დღე დარჩა. დღეს ყოფილი თანაგუნდელი საკმაოდ მწვავედ გააკრიტიკა კულტურის მინისტრმა თეა წულუკიანმა და აღნიშნა, რომ გახარიას წარმატებაში ეჭვი ეპარება.

"ქართული ოცნების" თავმჯდომარე ირაკლი კობახიძე კი აცხადებს, რომ გიორგი გახარიას რეიტინგი მმართველ პარტიასთან იყო დაკავშირებული:

"თავის დროზე ჩვენ ბევრი რამ გავაკეთეთ, რომ შექმნილიყო ეს რეიტინგი. საბოლოო ჯამში, ეს რეიტინგი შეიქმნა. თუმცა არსებითად ეს რეიტინგი დაკავშირებული იყო მმართველ ძალასთან. ის იყო პრემიერმინისტრი "ქართულ ოცნებაში" და ეს ფაქტორი არსებითად განსაზღვრავდა ამ რეიტინგს. შეგვიძლია, ეს რეიტინგები გადავამოწმოთ და ვნახოთ რა არის სურათი, ჩვენ გვაქვს ეს სურათი და შეგვიძლია გითხრათ, რომ სურათი არის არსებითად შეცვლილი" - აღნიშნავს კობახიძე.