იუსტიციის უმაღლეს საბჭოში 4 მოსამართლის არჩევას არასამთავრობო სექტორი ეხმაურება და სპეციალურ განცხადებას ავრცელებს. როგორც NGO-ების მიერ გავრცელებულ მიმართვაშია ნათქვამი, იუსტიციის საბჭოს დაკომპლექტება საფუძვლიანი ცვლილებების გარეშე, მიშელის დოკუმენტის სულისკვეთებას ეწინააღმდეგება და მისი მიზნის მიღწევას საფრთხეს უქმნის:

"მიგვაჩნია, რომ წარსული რეფორმების სისტემური გადაფასების და საფუძვლიანი ცვლილებების გარეშე, იუსტიციის უმაღლესი საბჭოს დაკომპლექტება პირდაპირ ეწინააღმდეგება ევროკავშირის მედიაციით მიღწეული შეთანხმების სულისკვეთებას და საფრთხეს უქმნის მისი მიზნების მიღწევას.

დღეს საქართველოს ხელისუფლება ცდილობს ფასადური რეფორმებით საერთაშორისო პარტნიორები და ქართული საზოგადოება დაარწმუნოს, რომ მას სასამართლოს სიტემის რეფორმირების სურვილი აქვს. ამავდროულად, ხელისუფლება არ აღიარებს სისტემაში არსებულ მთავარ პრობლემას - მოსამართლეთა კლანის არსებობას. მმართველმა გუნდმა, პირველ რიგში, უნდა აღიაროს სასამართლო სისტემაში არსებული კლანური მმართველობის შედეგად შექმნილი მძიმე ვითარება და შემდგომი სასამართლო რეფორმები სწორედ ამ გამოწვევების გააზრებით უნდა განახორციელოს", - წერია განცხადებაში.