"ეს არის როტაცია კლანისადმი ლოიალურად განწყობილ პირებს შორის" - "საია" იუსტიციის უმაღლესი საბჭოს მოსამართლე წევრების არჩევნებზე

პოლიტიკა - 17:43, 25 May, 2021

1132

"ეს არის როტაცია კლანისადმი ლოიალურად განწყობილ პირებს შორის, სადაც საბჭოს მოქმედ მოსამართლე წევრებს, გავლენიანი ჯგუფის კონტროლს დაქვემდებარებული სხვა მოსამართლეები ჩაანაცვლებენ", - ასე აფასებს "საია" იუსტიციის უმაღლესი საბჭოს მოსამართლე წევრების არჩევნებს.

როგორც განცხადებაშია ნათქვამი, ორგანიზაცია მიიჩნევს, რომ დღეს მართლმსაჯულების სისტემის ძირითადი გამოწვევა კლანური მმართველობა და ხელისუფლებასთან მისი ალიანსია.

ორგანიზაციის განცახდებით, მოსამართლეთა გავლენიან ჯგუფს სასამართლო სისტემასთან დაკავშირებული, მნიშვნელოვანი გადაწყვეტილებების მიღებაზე ზეგავლენის მოხდენის ბერკეტები აქვს.

"2021 წლის 26 მაისს მოსამართლეთა რიგგარეშე კონფერენციის სხდომა დაინიშნა, რომელზეც საბჭოს 4 მოსამართლე წევრის არჩევაა დაგეგმილი. წლების განმავლობაში ამ პროცესზე დაკვირვება აჩვენებს, რომ ის ძირითადად არაკონკურეტულ გარემოში მიმდინარეობს და საბჭოს შემადგენლობაში, როგორც წესი, მოსამართლეთა გავლენიანი ჯგუფის ლიდერები ხვდებიან, რომელთა უმრავლესობასაც უკავია ან წლების მანძილზე ეკავა მენეჯერული თანამდებობა.

არჩევნები განახლებასთან და ახალ პერსპექტივებთან ასოცირდება, თუმცა მოლოდინები ამ შემთხვევაში უსაფუძვლოა. საია მიიჩნევს, რომ ეს არის როტაცია კლანისადმი ლოიალურად განწყობილ პირებს შორის, სადაც საბჭოს მოქმედ მოსამართლე წევრებს, გავლენიანი ჯგუფის კონტროლს დაქვემდებარებული სხვა მოსამართლეები ჩაანაცვლებენ",- წერია ორგანიზაციის განცხადებაში.

საია წერს, რომ "კლანის" ძირითადი საყრდენი სწორედ იუსტიციის უმაღლეს საბჭოა, რომელიც სასამართლო სისტემასთან დაკავშირებულ ძირითად გადაწყვეტილებებს იღებს.

ცნობისთვის, იუსტიციის უმაღლეს საბჭოში, 26 მაისს XXIX რიგგარეშე კონფერენცია ანიშნეს, რომელზეც დაგეგმილია საქართველოს იუსტიციის უმაღლესი საბჭოს 4 მოსამართლე წევრის არჩევა. ვადა ეწურება 4 მოსამართლეს - დიმიტრი გვრიტიშვილს, ვასილ მშვენიერაძეს, ირაკლი ბონდარენკოსა და ირაკლი შენგელიას. კონფერენციის შეჩერების მოთხოვნით განცხადება გაავრცელეს არასამთავრობო ორგანიზაციებმაც.