რიონის ხეობის მცველების ლიდერი ვარლამ გოლეთიანი აქციაზე ლგბტ სამკლაურის გამო აქტივისტების გაძევებას განცხადებით გამოეხმაურა და აღნიშნა, რომ ნებისმიერი სიმბოლიკა, რომელიც სახელმწიფო სიმბოლოს არ აღნიშნავს, მათ აქციაზე არ დაიშვება. გოლეთიანის განმარტებით, მათი მოძრაობა ემიჯნება ძალადობას, სიმბოლოები კი შეიძლება, დაპირისპირების მიზეზი გახდეს:

"რაღაც დაპირისპირება თურმე მომხდარა გუშინაც და დღესაც ჰქონდა გარკვეულ პროვოკაციას ადგილი.

ჩვენი მოძრაობა ემიჯნება ზოგადად ყოველგვარ ძალადობას. ზოგადად ჩვენი პოზიციაა, რომ მშვიდობიანი უნდა იყოს ჩვენი პროტესტი ყველა ეტაპზე.

იცით, რომ ჩვენი სახალხო მოძრაობა აერთიანებს ყველა ადამიანს და ყველა მოქალაქეს და ყველას აქვს უფლება, თავის მოქალაქეობრივ ფარგლებში გამოხატოს პროტესტი. ამიტომ, ის დაპირისპირებები, რაც აქ ხდება, ძალადობის ნაწილში, ვემიჯნებით.

დაპირისპირების მიზეზი შეიძლება გახდეს გარკვეული სიმბოლიკები და ჩვენ მუდმივად ვამბობთ, რომ ნებისმიერი ტიპის სიმბოლიკა, რაც არის სახელმწიფო სიმბოლიკა, არ დაიშვება ჩვენს აქციებზე და გთხოვთ, რომ ეს გაითვალისწინოთ" - განაცხადა გოლეთიანმა.