საქართველოში ევროკავშირის ელჩის კარლ ჰარცელის თქმით, ის მოხარულია, რომ მოხდა ფართო კონსესუსი საარჩევნო რეფორმის გარშემო.

მისივე თქმით, საარჩევნო რეფორმის პარალელურად, 19 აპრილის შეთანხმების ერთ-ერთი საკვანძო ნაწილი არის სასამართლო რეფორმა. ჰარცელის განცხადებით, ამ მიმართულებით მნიშვნელოვანია ყურადღება გამახვილდეს უზენაეს სასამართლოში მოსამართლეთა და იუსტიციის უმაღლეს საბჭოში წევრთა დანიშვნის პროცესზე, რადგან, საბოლოო ჯამში, ეს ზრუნველყოფს სასამართლო სისტემის მიმართ ნდობის აღდგენას.

"ჩვენ ვართ ახლა იმ ეტაპზე, როდესაც 19 აპრილის შეთანხმების იმპელემენტაცია ხდება. პირველ რიგში, მოხარული, რომ გუშინ, როგორც ჩანს, ფართო კონსენსუსის მიღწევა მოხდა საარჩევნო რეფორმების ირგვლივ და ახლა ჩვენ ველით, რომ ეს კანონპროექტი გადაეგზავნოს ვენეციის კომისიას და შემდეგ, ფართო განხილვებისთვის წარედგინოს პარლამენტს.

სასამართლო სისტემის რეფორმა19 აპრილის შეთანხმების კიდევ ერთი საკვანძო კომპონენტია და ეს მიღწეული შეთანხმების კიდევ ერთი ძალიან მნიშვნელოვანი ნაწილია, რომელსაც ყველა მხარე ძალიან სერიოზულად ეკიდება. ვიტყოდი, რომ მოკლევადიან პერიოდში მნიშვნელოვანი იქნება ყურადღების გამახვილება უზენაესი სასამართლოს მოსამართლეების დანიშვნის პროცესზე და ასევე, იუსტიციის უმაღლეს საბჭოში წევრთა თანამდებობაზე განმწესების პროცესზე. ეს ორი მიმართულება ძალიან მნიშვნელოვანია ნდობის აღდგენისთვის სასამართლოს სისტემის მიმართ. ამის გარდა, იქნება სხვა რეფორმების განსაზღვრის ეტაპობრივი პროცესი, რომელშიც ევროკავშირი და სხვა საერთაშორისო პარტნიორებიც აპირებენ მონაწილეობის მიღებას"- განაცხადა ჰარცელმა.