პარლამენტის თავმჯდომარის მოადგილე არჩილ თალაკვაძე დმანისში მიმდინარე მოვლენებს გამოეხმაურა და განაცხადა, რომ დაპირისპირების ეთნიკურ კონფლიქტად შეფუთვა, საზოგადოების შეცდომაში შეყვანის მცდელობაა. მისი განმარტებით, ოპონენტებს, ვინც ანგაჟირებული არიან პოლიტიკურად, სურთ, რომ პრობლემა წარმოაჩინონ უფრო დიდად და იქ, სადაც ის არ არსებობს:

"ამ ინციდენტის შეფუთვა და ამის გატანა, როგორც ეთნიკურ ნიადაგზე მომხდარი დაპირისპირება, არის მიუღებელი. ეს დამაზიანებელია ჩვენი საზოგადოებისთვის და ეს არის საზოგადობის შეცდომაში შეყვანის მცდელობა ოპონენტების მხრიდან. მთელმა საზოგადოებამ დაინახა, რომ ეს იყო ყოფით ნიადაგზე მომხდარი კონფლიქტი.

ძალადობა რომ მომხდარიყო სხვა ორ მოქალაქეს შორის და არანაირი ეთნიკური განმასხვავებელი იქ არ ყოფილიყო, რა რეაგირება ექნებოდათ ჩვენს ოპონენტებს? ნებისმიერ მოქალაქეს ექნებოდა რეაგირება, რომ მიუღებელია ძალადობა. ოპონენტებს, ვინც ანგაჟირებული არიან პოლიტიკურად, სურთ, რომ პრობლემა წარმოაჩინონ უფრო დიდად და იქ, სადაც ის არ არსებობს. ისინი ყველაფერზე მიდიან. სერიოზული კომენტარი ამაზე არც შეიძლება, რომ მაღაზიაში მომხდარი ყოფითი კონფლიქტი გადავთარგმნოთ, როგორც ეთნიკური დაპირისპირება", - განაცხადა თალაკვაძემ.

შეგახსენებთ, დღევანდელი დაპირისპირება გუშინდელი ინციდენტის გაგრძელებაა. გუშინ ერთ-ერთ მაღაზიასთან ახალგაზრდების ორი ჯგუფი ერთმანეთს ფიზიკურად გაუსწორდა.

როგორც ცნობილი ხდება, გუშინდელი ანგარიშსწორება ერთ-ერთ მაღაზიაში პროდუქციის ვალადა გაცემაზე უარს მოჰყვა. ინციდენტის გამო ჩხუბში მონაწილე რამდენიმე პირი დაკითხვაზე გადაიყვანეს, დღეს კი ადგილობრივ სვანებსა და ეთნიკურ აზერბაიჯანელებს შორის დაპირისპირება გამწვავდა.