ოცნების დეპუტატის ირაკლი ქადაგიშვილის განცხადებით, ხელისუფლებამ დმანისში მიმდინარე მოვლენებზე დროულად უნდა მოახდინოს რეაგირება, რათა ვითარება ეთნიკურ კონფლიქტში არ გადაიზარდოს. მისი განმარტებით, ასეთ დროს ყოველი საათი ძვირფასია და მნიშვნელოვანია, ხელისუფლება ეფექტურად ჩაერიოს:

"ვფიქრობ, ხელისუფლებამ კიდევ უფრო სწრაფი და ეფექტური რეაგირება უნდა მოახდინოს, რადგან ყოველი საათი ასეთი მოვლენების განვითარების დროს არის ძვირფასი, ხელისუფლება უმაღლეს დონეზე უნდა ჩაერთოს იმისათვის, რომ სიტუაცია უმაღლეს დონეზე იყოს განმუხტული, მნიშვნელოვანია, რომ ასეთ დროს კონფლიქტის წარმოშობის პირველივე კერა სამართლებრივად სწორად იყოს შეფასებული და სამართლებრივად დროული რეაგირება მოხდეს. მე ვფიქრობ, მთავრობა დაინტერესებულია, კონფლიქტი სრულად აღმოიფხვრას და ყოფითი კონფლიქტი, რომელიც გუშინ ბანალური მიზეზით დაიწყო, დამთავრდეს, როგორც ყოფითი და არავითარ შემთხვევაში მისი განვრცობა არ მოხდეს, მისი რაიმე სახით ეთნიკური, ეროვნული ელფერით შემოსვა მიუღებელია, ჩვენი ქვეყნის შიდა პოლიტიკიდან და რეგიონში არსებული ვითარებიდან გამომდინარე" - აცხადებს ქადაგიშვილი.

შეგახსენებთ, დღევანდელი დაპირისპირება გუშინდელი ინციდენტის გაგრძელებაა. გუშინ ერთ-ერთ მაღაზიასთან ახალგაზრდების ორი ჯგუფი ერთმანეთს ფიზიკურად გაუსწორდა.

როგორც ცნობილი ხდება, გუშინდელი ანგარიშსწორება ერთ-ერთ მაღაზიაში პროდუქციის ვალადა გაცემაზე უარს მოჰყვა. ინციდენტის გამო ჩხუბში მონაწილე რამდენიმე პირი დაკითხვაზე გადაიყვანეს, დღეს კი ადგილობრივ სვანებსა და ეთნიკურ აზერბაიჯანელებს შორის დაპირისპირება გამწვავდა.