თბილისის საქალაქო სასამართლოში კარტოგრაფების საქმის არსებითი განხილვა გრძელდება. დღევანდელ პროცესზე ბრალდების მხარის მოწმეები დაიკითხნენ, რომლებმაც ილიჩოვასა და მელაშვილის გამამართლებელი ჩვენებები მისცეს.

საქართველოს ყოფილი ელჩი აზერბაიჯანში ზურაბ გუმბარიძე აცხადებს, რომ შეუძლებელია, მელაშვილს ანტისახელმწიფოებრივი გადაწყვეტილება მიეღო, რადგან კომისია მოდიოდა შედეგებით:

"გამორიცხულია, იმ თვალსაზრისით, რომ კომისია მოდიოდა შედეგებით, ამაზე შეკითხვა ბევრი კომისიისთვის არის უხერხული. ეს სხვა საკითხია, ბევრი საკითხები ჯერ კიდევ განხილვაშია, კომისიები მუშაობენ, ასე რომ ეს პროცესი გრძელდება. რაც შეეხება იყო თუ არ იყო ჩემი შეფასება არაა სწორი, ეს კარტოგრაფებმა და ექსპერტებმა უნდა გადაწყვიტონ", - აღნიშნა გუმბარიძემ.

პროკურატურის კიდევ ერთი მოწმე საგანგებო დავალებათა ელჩი, გელა დუმბაძე იყო, რომელიც 2002-2005 წლებში საქართველოს საელჩოს მრჩეველი იყო აზერბაიჯანში. მან ჟურნალისტებს განუცხადა, რომ იმ პერიოდში გამორიცხულია, ვინმეს რაიმე გადაწყვეტილება ქვეყნის საზიანოდ მიეღო:

"დაკითხვა სასამართლოზე მოხდა იმ კონტექტსში, რომ 2002-2005 წლებში ვიყავი საქართველოს საელჩოს მრჩეველი აზერბაიჯანში და ვესწრებოდი 2-3 საზღვრის დელიმიტაციის სხდომას. დინამიურად გრძელდებოდა პროცესი, ის იყო ადამიანი, რომელიც წარმოადგენდა ექსპერტს. არავითარი ნიშანი იმისა, იმ პერიოდში როდესაც მე ვესწრებოდი სხდომებს არ არსებობდა, რომ ვიღაც რაღაც გადაწყვეტილებას იღებდა ქვეყნის საზიანოდ", - განაცხადა დუმბაძემ.