ოცნება საარჩევნო რეფორმაში შესატან ცვლილებებს განიხილავს და პირველ რიგში არა ადმინისტრაციის ცვლილებას ან კომისიის წევრების დაკომპლექტების წესის შეცვლას, არამედ უცხო ქვეყნის მოქალაქეების ჩართულობას კრძალავს.

მმართველი გუნდის ინიციატივის მიხედვით, ახალი საარჩევნო რეფორმით უცხო ქვეყნის მოქალაქეს საარჩევნო აგიტაციაში მონაწილეობის უფლება არ ექნება, რასაც ოპოზიცია კატეგორიულად ეწინააღმდეგება.

ენმ-ს წევრის ხატია დეკანოიძის განცხადებით, ეს მუხლი საკმაოდ მძმეა და მიშელის შეთანხმებას ხელს არ უწყობს:

"ეს არის ის ჩანაწერი, რომელზეც ვენეციის კომისიას და ჩვენს საერთაშორისო პარტნიორებს ჰქონდათ ძალიან მკაფიო პოზიცია. რომ ეს არის ძალიან მძიმე მუხლი, რომელიც არ უწყობს მიშელის შეთნხმებას ხელს" - აღნიშნავს დეკანოიძე.

ოცნების დეპუტატის შალვა პაპუაშვილის განცხადებით, საარჩევნო ცვლილებები მიშელის დოკუმენტთან კავშირში არ არის:

"ეს არის ცალკე მდგომი კანონპროექტი, რომელიც არ არის დოკუმენტით გათვალისწინებული საარჩევნო რეფორმის ნაწილი. უცხო ქვეყნის მოქალაქეებისთვის საარჩევნო აგიტაციაში მონაწილეობის მიღების სანქცირება და აკრძალვა, საქართველოს სუვერენიტეტის საკითხია " - აცხადებს პაპუაშვილი.

საარჩევნო რეფორმაზე მსჯელობა ხელისუფლებასა და მიშელის დოკუმენტზე ხელმომწერ ოპოზიციას შორის უკვე ორი დღეა მიმდინარეობს.