თავდაცვის სამინისტროს ყოფილი მაღალჩინოსანი, ალექსანდრე ნინუა, რომელიც სამართალდამცავებმა გუშინ დააკავეს, ჩანაწერს ავრცელებს. აღნიშნული ჩანაწერი ტელეკომპანია „რუსთავი 2“-მა მოიპოვა.

ჩანაწერი ორი დღის წინ არის გაკეთებული, სადაც ნინუა აღნიშნავს, რომ იმ შემთხვევაში თუ ამ ჩანაწერს საზოგადოება იხილავდა იგი უკვე დაკავებული იქნებოდა:

„მას შემდეგ რაც დამთავრდა არჩევნები, ჩემი ყოფილი სამსახურის სპეციფიკიდან გამომდინარე გარკვეული შეკითხვები ჰქონდა გამოძიებას და ამაში არაფერს ტრაგიკულს არ ვხედავდი, მე ყველა კითხვას პასუხს ვცემდი. ამას მოყვა ის, რომ ჩემი მოადგილეების დაბარება დაიწყეს, გაიშალა თემა და ჩავიდა მენეჯერებამდე, იმედიანად იყვნენ გამომძიებლები, რომ რაღაც ბომბს აღმოაჩენდნენ. ეს რა თქმა უნდა ასე არ მოხდა.

რამდენიმეჯერ შემომთავაზეს ქვეყნიდან წასვლა. ეს სიბინძურეები რაც ჩვენი მისამართით გაჟღერდა რაღაც დოზით გამართლდებოდა ქვეყნიდან რომ წავსულიყავი და იტყოდნენ, რომ გავიქეცი.

მე კარგი და მეგობრული ურთოერთობა მაქვს ჩემს თანამშრომლებთან, მორალურად აუტანლად მიმაჩნია ის, თუ როგორ იტანჯება ამდენი ხალხი ჩემს გამო. მე ვთვლი, რომ რაღაც ნაბიჯი უნდა გადავდგა და დავეხმარო მათ. ეს გადაწყვეტილება ჩემთვის ძალიან ძნელია, მე გადავწყვიტე ამ ხალხის დახმარება.

მე ჩემი მეგობრების წინაშე ვალდებულად ვთვლი თავს, რომ წავიდე ციხეში, ოღონდ არა იმ დანაშაულისთვის რომელიც არ ჩამიდენია, არამედ იმისთვის, რაც ჩამიდენია, თუ ამ ჩანაწერს ვინმე უყურებს, ესეიგი ციხეში ვარ, რამდენიმე წუთის წინ 2013 წლის 12 დეკემბერი დაიწყო“, - აღნიშნავს ჩანაწერში ნინუა.

შეგახსენებთ, რომ ალექსანდრე ნინუა ორი დღის წინ იარაღის უკანონო შეძენა-შენახვა-ტარებისთვის დააკავეს. დღეს მისი საქმის გნხილვა დაიწყო თბილისის საქალაქო სასამართლოში. პროცესზე ბრალდებამ ნინუასთვის აღმკვეთი ღონისძიების სახით წინასწარი პატიმრობა მოითხოვა, რაც მოსამართლემ დააკმაყოფილა. სასამართლოს აღნიშნული გადაწყვეტილება დაცვის მხარემ არ გააპროტესტა და მის გასაჩივრებას სააპელაციო სასამართლოში არ გეგმავენ.