20 ივნისის ღამის დაზარალებულები ერთობლივ განცხადებას ავრცელებენ, სადაც ამნისტიის შესახებ კანონპროექტს ეწინააღმდეგებიან, როგორც ოცნების მიერ დაინიცირებულს, ისე ოპოზიციის ალტერნატიულ ვერსიას:

"ჩვენთვის მოსალოდნელი იყო და ამას ვპროგნოზირებდით კიდევაც, რომ შარლ მიშელის მედიაციით შექმნილ დოკუმენტზე ოპოზიციური პარტიების ხელმოწერის შემდგომ, რომლის პირველი პუნქტი გულისხმობდა "19-21 ივნისის ყველა დარღვევაზე და დაკავებაზე ამნისტიას" "ქართული ოცნება" გამოიყენებდა შანსს და შეეცდებოდა ამნისტიის კანონპროექტით სამართლებრივი-პოლიტიკური პასუხისმგებლობის მოხსნას 20 ივნისის ანტისაოკუპაციო აქციის სადამსჯელო ოპერაციაზე, რომლის ფარგლებში ჩვენ მშვიდობიანმა დემონსტრანტებმა გარდა უფლებრივი დარღვევებისა, მივიღეთ მძიმე ფიზიკური ზიანი. აქედან გამომდინარე ჩვენთვის გასაკვირი არ იყო ოცნების მიერ კანონპროექტის ამ ტექსტით მიღება, რომელიც ამნისტიას ახებს 20 ივნისის ყველა ჯალათსა და უკანონო ბრძანების გამცემ საჯარო მოხელეებს.

რაც შეეხება ოპოზიციის კანონპროექტს შეიძლება ითქვას, რომ ეს ინიციატივა მათი მხრიდან არის მორალური სახის შენარჩუნების ფუჭი პოლიტიკური მცდელობა, რომელიც ვერც სამართლებრივ კრიტიკას ვერ უძლებს. კერძოდ:

მიუხედავად იმისა, რომ მათ საჯარო ბოდიშიც კი მოიხადეს დაზარალებულების საქმის კურსში ჩაყენების გარეშე ამნისტიის საკითხზე შეთანხმების გამო, კანონპროექტის მომზადების პროცესშიც კი არ ჩართეს დაზარალებულები, რაც კიდევ ერთი არაეთიკური და პრაგმატულად გაუმართლებელი ქმედებაა მათი მხრიდან. ამ ქმედებით მათ გააგრძელეს ჩვენი შელახული უფლებების ბედის კულისებში გადაწყვეტა ჩვენგან ყოველგვარი კოორდინაციისა და შეთანხმების გარეშე. ხაზგასასმელია ისიც, რომ ამნისტიის დოკუმენტი სტანდარტულად გულისხმობს დაზარალებული მხარის თანხმობის საჭიროებას,ხოლო 20 ივნისს დანაშაულის მსხვერპლს და მონაწილე მხარეს სწორედ მშვიდობიანი დემონსტრანტები წარმოვადგენთ და არა ოპოზიციონერი პოლიტიკოსები.

ამ კანონპროექტით ცალსახად ხდება სამი სამართალდამცავის ამნისტია, რომელთაგან ერთ-ერთი პროკურატურის ვერსიით ბრალდებული იყო სამსახურეობრივი უფლებამოსილების გადამეტების, კერძოდ მოქალაქეებისთვის დამიზნებით სროლის ფაქტზე. ჯალათი პოლიციელის ხელაღებით ამნისტია, რომელიც თავისუფლად შეიძლება იყოს სხვა მძიმე დაზიანებების ( მხედველობის დაკარგვა და ა.შ.) ამსრულებელი კატეგორიულად მიუღებელია ჩვენთვის.

კანონპროექტი ამტკიცებს რომ პასუხისმგებლობისგან ვერ გათავისუფლდებიან ბრძანების გამცემი პოლიტიკური თანამდებობის პირები, თუმცა სრულიად ცხადი და დასაბუთებული ეჭვი არსებობს, რომ რეალური პასუხისმგებლობა იმ პირებსაც მიემართება, რომლებიც არ იკავებდნენ პოლიტიკურ თანამდებობას იკავებდნენ (ბიძინა ივანიშვილი და ანზორ ჩუბინიძე).

მნიშვნელოვანია ის ფაქტი, რომ დაშავებულ მშვიდობიან დემონსტრანტთა უმრავლესობას დღემდე არ აქვს მინიჭებული დაზარალებულის სტატუსი და შესაბამისად არც ჯანმრთელობის რეაბილიტაციის სახელმწიფო გარანტიები გააჩნიათ. აღნიშნული რედაქციით ამნისტიის მიღება ფაქტიურად გამოიწვევს პროკურატურის წარმოებაში არსებული სისხლის სამართლის საქმეების შეწყვეტას, რაც შეუძლებელს გახდის მოცემულ საქმეებზე პირთა დაზარალებულად ცნობასა და მტკიცებულებებზე წვდომას, რაც თავის მხრივ უნდა გამხდარიყო საფუძველი დავების როგორც ადგილობრივ ისე საერთაშორისო სასამართლო ინსტანციებში" - ნათქვამია განცხადებაში.

განცხადებას ხელს 11 დაზარალებული აწერს - ისინი აქციის მონაწილეების ე.წ. ჯალათებისა და დარბევის ბრძანების გამცემების მიმართ ამნისტიის გავრცელების წინააღმდეგნი არიან:

"პრინციპულად მიუღებელია და ჩვენ ვგმობთ როგორც მმართველი პარტიის მომზადებულ პროექტს, ასევე, საპარლამენტო ოპოზიციის პროექტს. გასაგებია, რომ ხელისუფლება ცდილობს მმართველი პარტიის სახით მოახდინოს სამართლებრივი და პოლიტიკური პასუხისმგებლობა და მთლიანად ამნისტირება ყველა ჯალათის და ყველა უკანონოა ბრძანების გამცემი ორგანიზატორის, მაგრამ რაც შეეხება ოპოზიციური საპარლამენტო პარტიას, მათ არ აქვთ მკაცრად გაწერილი სამართლებრივი მექანიზმები, რომელიც მოგვცემს იმის გარანტიას, რომ თუნდაც მათი კანონპროექტის დამტკიცების შემთხვევაში, რომ დაისჯებიან დამნაშავეები. ველოდებით საჯაროდ გამოთქმულ მათ შემოთავაზებას ყველას მიმართ" - განაცხადა ერთ-ერთმა აქტივისტმა.