,,7 თვის განმავლობაში ვიყავი საქართველოს შრომის, ჯანმრთელობისა და სოციალური დაცვის მინისტრი. თურმე 7 თვეც კი სრულიად საკმარისია, რომ ადამიანებს შორის ისეთი ურთიერთნდობა, პატივისცემა და ადამიანური გაგება ჩამოყალიბდეს, რომ მას ვერც "ასავალ-დასავალის" იდეოლოგია და ვერც "სამართლიანობის აღდგენის" ლოზუნგით მოქმედი სახელმწიფო აპარატი ვერ მოერიოს.

კიდევ ერთხელ დიდი მადლობა მინდა ვუთხრა ჯანდაცვის სამინისტროსა და სოციალური მომსახურების სააგენტოს ყველა თანამშრომელს თავიანთი პატიოსნების, საქმისადმი ერთგულებისა და პროფესიონალიზმისათვის. მათ ნაწილს ასევე ბოდიშს ვუხდი, რომ არაერთხელ მიიყვანეს პროკურატურაში დაკითხვაზე და ახლა ქუთაისში ატარებენ ჩემს სასამართლო პროცესზე.

ამ აშკარად პოლიტიკურად მოტივირებულ სისხლის სამართლის საქმეზე მიმდინარე სასამართლო პროცესზე მიცემული ჩვენებებიდან, განასაკუთრებით ბოლო 2 დღის განმავლობაში, ვანოს და ჩემს მიმართ წაყენებული ბრალი არ იკვეთება და არ ველი ჩვენს მიმართ გამამტყუნებელ განაჩენს.

მაგრამ განაჩენი გამამტყუნებელი რომც იყოს, ჯანდაცვის სამინისტროსა და სოციალური მომსახურების სააგენტოს თანამშრომელთა მიერ სასამართლოზე მიცემული ჩვენებები და ჩემს მიმართ გამოხატული ადამიანური პატივისცემა სრულ საფუძველს მაძლევს, სინდისი მშვიდად მქონდეს და მომავალშიც თავაწეულმა ვიარო.

მადლობა, კოლეგებო. წინ დიდი საქმეები გველოდება!“, - წერს ზურაბ ჭიაბერაშვილი.