ქუთაისის რეფერალურ ჰოსპიტალში კოვიდის შემდგომი ჯანმრთელობის მართვის ცენტრი გაიხსნა

ჯანმრთელობა - 15:30, 05 May, 2021

1890

დღეიდან იმერეთის რეგიონის მოსახლეობას საშუალება აქვს კორონავირუსის შემდგომი ჯანმრთელობის მდგომარეობის მონიტორინგი და მკურნალობა ქუთაისის რეფერალურ ჰოსპიტლის ბაზაზე არსებულ კოვიდის შემდგომი ჯანმრთელობის მართვის ცენტრში ჩაიტაროს.

მსოფლიო გამოცდილებამ აჩვენა, რომ კოვიდის შემდგომ ვირუსი ადამიანის ორგანიზმზე კვალს ტოვებს და მისი გართულებების მართვა ჯანმრთელობის მდგომარეობის შენარჩუნებისთვის მნიშვნელოვანია. გართულებები განსაკუთრებით ხშირია რისკ-ჯგუფში შემავალი ადამიანებისთვის, რომელთაც აღენიშნებათ შაქრიანი დიაბეტი, არტერიული ჰიპერტენზია, ჭარბი წონა, გულ-სისხლძარღვთა დაავადებები და სხვა. ჯანმრთელობის მდგომარეობის შემოწმება რეკომენდებულია მათთვისაც, ვისაც კოვიდ 19-ის გადატანის შემდგომ ჩივილები არ აღენიშნებათ.

აღსანიშნავია, რომ ქუთაისის რეფერალურ ჰოსპიტალს კოვიდ ინფიცირებული პაციენტების მართვის კუთხით დიდი გამოცდილება და მნიშვნელოვანი როლი აქვს რეგიონში. ის იყო ერთ-ერთი პირველი, რომელიც ინფექციასთან ბრძოლაში 144 საწოლით ჩაერთო და 1 800 მდე ინფიცირებული პაციენტი გამოაჯანმრთელა.

ჰოსპიტლის ბაზაზე არსებულ კოვიდის შემდგომი ჯანმრთელობის მართვის ცენტრში კოვიდ-გადატანილი პაციენტების ჯანმრთელობაზე ექიმების მულტიდისციპლინური გუნდი იზრუნებს. ცენტრში შესაძლებელია ამბულატორიული და საჭიროების შემთხვევაში სტაციონარული მომსახურების ერთ სივრცეში მიღება. დასაქმებული სამედიცინო პერსონალი, გადამზადებულია ჯონს ჰოპკინსის უნივერსიტეტში მოღვაწე ექიმი-ინფექციონისტის, ასისტანს-პროგრამის დირექტორის, მამუკა მაჩაიძის და ჰოლანდიაში მოღვაწე ოჯახის ექიმის, ნინა ბაკაშვილის მიერ.

გარდა ამისა, ცენტრი სერვისებზე ხელმისაწვდომობის გაზრდის მიზნით მოსახლეობას მხარდაჭერის პროგრამის ფარგლებში უსასყიდლოდ შესთავაზებს თერაპევტის მომსახურებას.

ევექსის ჰოსპიტალური ქსელი მოსახლეობისთვის სერვისზე გეოგრაფიულ ხელმისაწვდომობის გაზრდის მიზნით კოვიდის შემდგომ ჯანმრთელობის ცენტრებს ბათუმის სამედიცინო დაწესებულებების ბაზაზეც აამოქმედებს.
დამატებითი ინფორმაციის მისაღებად დარეკეთ ნომერზე 2 600 600 ან ეწვიეთ ვებ-გვერდს www.evexhospitals.ge