კარტოგრაფების საქმეზე ბრალდებული ივერი მელაშვილი დავით-გარეჯში მომხდარ თავდასხმას იხსენებს და აცხადებს, რომ თავდამსხმელები უდაბნოში ვიღაცის მიერ ორკესტრირებულად იყვნენ შეკრებილები. მისი თქმით, სასულიერო პირები შეურაცხმყოფელად მიმართავდნენ და არაფრის გაგონება სურდათ:

"მოხდა ყოველ შემთხვევაში უდაბნოში მოსახლეობის შეკრება, ეს ვიღაცის მიერ ორკესტრირებულია, გააფრთხილა ვიღაცამ, რომ მოდიან და დახვდით, ასე შემდეგ. რაც შეეხება მაგ მამაოებს, როგორც თვითონ ახსნეს, ტრაპეზი ჰქონდათ, დაგვინახეს და მერე ჩამოვიდნენ, ამას აქ რა უნდა, მაგ სიტყვებით მოვიდნენ: შენ აქ რა გინდა, შე სამშობლოს გამყიდველო, შე გადამცემო. შევეცადე ძალიან წყნარად ამეხსნა, რომ მათი ეს ინფორმაცია აბსოლუტურად არ შეესაბამება სინამდვილეს, მოდი ასე ვთქვათ, რომ მათ ძირითად ნაწილს ამის გაგონება არ სურდათ.

ხელით არავინ შემხებია, მაგრამ ჟურნალისტებს შეეხნენ, როგორც ოპერატორს, ასევე, ნინუცასაც, რაც საკმაოდ აღმაშფოთებელია. მე ამას მთავრობის მიერ აგორებულ კამპანიას ვუკავშირებ, მეტს ვერაფერს ვერ ვფიქრობ", - აცხადებს მელაშვილი.

შეგახსენებთ, გუშინ დავით-გარეჯში სიუჟეტის გადაღებისას მთავარი არხის ჟურნალისტს ნინუცა კეკელიასა და მის ოპერატორს თავს დაესხნენ და ფიზიკურად გაუსწორდნენ, ივერი მელაშვილს კი სიტყვიერი შეურაცხყოფა მიაყენეს.