ნაციონალური მოძრაობის წევრი ელგუჯა ბაგრატიონი სამართალდამცველებმა ხელვაჩაურში, ურეხის სასაფლაოზე დააკავეს. ის პოლიციელის კანონიერი მოთხოვნისადმი დაუმორჩილებლობია ფაქტზე აიყვანეს.

„პოლიციელს ვუთხარი, რომ დემონსტრაციულად დავარღვევდი წესს და შევიდოდი სასაფლაოზე, მაგრამ ტელევიზიები ვიდრე მოვიდოდნენ, დამაკავეს,“ – ამბობს უმაღლესი საბჭოს წევრი „ერთიანი ნაციონალური მოძრაობიდან“ ელგუჯა ბაგრატიონი.

„მე იქ მივედი იმისთვის, რომ მენახა, რა ხდებოდა, ადამიანები მიდიოდნენ, მაგრამ პოლიცია არ უშვებდა. დაღუპული მეხანძრე-მაშველის ცოლის შემთხვევა იყო გამაღიზიანებელი, მე რა ვქნა, ჩემ გამო ხომ არ მომკვდარაო, ეუბნებოდა ხელვაჩაურის პოლიციის უფროსის მოადგილე შოთა ბაღიაშვილი დაღუპულის ცოლს. ის ითხოვდა პასკას დავდებ საფლავზე და მალევე გამოვალო… ვუთხარი პოლიციის უფროსის მოადგილეს, რომ ეს არ იყო სწორი და მე შევიდოდი სასაფლაოზე დემონსტრაციულად. ტელევიზიებს დავურეკე და მათ ველოდებოდი. პოლიციის უფროსის მოადგილე ამ დროს ტელეფონით ესაუბრა ვიღაცას და, როგორც ჩანს, მიიღო დავალება ჩემს დაკავებაზე,“ – ამბობს ელგუჯა ბაგრატიონი.

პოლიტიკოსი ბათუმის საქალაქო სასამართლოში გადაიყვანეს სადაც ის მოსამართლემ ხელწერილის საფუძველზე გაათავისუფლა.

ფოტო "ბათუმელები"