მომღერალი გია გაჩეჩილაძე იგივე უცნობი ბოლო პერიოდში აქტიურად ცდილობს ისევ საზოგადოების ყურადღების ცენტრში დაბრუნდეს და ამისთვის არა ერთ ხერხს მიმართა. თუმცა, როგორც აღმოჩნდა, ქვეყანაში ყველაზე სენსიტიური თემა ისევ პატიმრებია, ამიტომ, გადაწყვიტა, თავადაც გამოჩნდეს ამ საკითხის მოვლენების ირგვლივ და ვახო სანაიაზე თავდასხმისთვის დაკავებულებს გამოუცხადოს მხარდაჭერა.

არა მხოლოდ მხარდაჭერა, ის თავდებშიც კი უდგება ადამიანებს, რომლებიც ძალადობრივი ქმედებისთვის არიან ბრალდებულები, თუმცა, მოსამართლის კითხვაზე, იცნობს თუ არა ის დაკავებულებს და თავდებობის შემთვევაში როგორ გააკონტროლებს მათ ქცევას, უცნობმა კეთილშობილი ღიმილით უპასუხა, რომ უბრალოდ სურს, მათ გასაჭირში დაეხმაროს:

„ეს საქმე ძალიან გახმაურდა, არაერთი გადაცემა გავაკეთეთ, მოწვეული გვყავდა ბრალდებულების ახლობლები, მშობლებს შევხვდით, მათ აქამდე დანაშაული არ ჩაუდენიათ, ნასამართლევი არ არიან, თავიანთ წრეში სხვა სახელით სარგებლობენ. აუცილებელია, ამ ადამიანებს გაჭირვებაში დავეხმაროთ. გადავწყვიტეთ, ჩვენ ავიღოთ მათი თავდებობა. ისინი უკეთილშობილესი ადამიანები არიან, თუ ჩვენ ამაში შევცდებით, ჩვენ ვიკისრებთ, ის თანხები დავფაროთ, რაც იქნება", - განაცხადა გაჩეჩილაძემ.

მიუხედავად იმისა, რომ დღეს ბევრი ადამიანი გასაჭირშია, უცნობმა ერთ-ერთი გახმაურებული თემა აირჩია აქტივობისთვის და ცდილობს, გადაფაროს სხვა მნიშვნელოვანი თემები, რომლებიც ქვეყანაში არსებობს. რამდენად მოახერხებს ამას, ეს ცალკე საკითხია, თუმცა, მისი მცდელობა სულ მცირე დაფასებას ღიმილით მაინც იმსახურებს.