პარლამენტის უკვე არჩეული თავმჯდომარის კახა კუჭავას განცხადებით, პარლამენტი დღეს ყველაზე ქმედითია არა მხოლოდ წარმომადგენლობით, არამედ იმ ბერკეტებით, რომლებიც რეგლამენტითაა გათვალისწინებული:

"დღეს არსებული რეალობიდან გამომდინარე, ჩვენ ნამდვილად შეგვიძლია ვთქვათ, რომ ასეთი ქმედითი პარლამენტი არ გვყოლია არასდროს. მე არ ვგულისხმობ მხოლოდ წარმომადგენლობას, ეს არის ის ბერკეტები, რომლებიც ჩვენ ხელში გვაქვს რეგლამენტით გათვალისწინებული არამხოლოდ საკანონმდებლო, არამედ საზედამხედველო ფუნქციის განხორციელების კუთხით. მე ვთვლი, რომ ამ მიმართულებით არასდროს არ უნდა გავჩერდეთ და კიდევ უფრო წინ წავიდეთ. ჩვენ ძალიან ბევრი საინტერესო, ინოვაციური მექანიზმი დავნერგეთ წინა პარლამენტში.

ჩვენ ვიწყებთ ახლა ეტაპს საპარლამენტო ცხოვრების და აუცილებელია საზოგადოების ნდობა პარლამენტის საქმიანობის მიმართ გავზარდოთ, ისე, როგორც ამას იმსახურებს ეს პარლამენტი. მე ვისურვებ, რომ მალე ვიხილოთ ჩვენ სავსე დარბაზი, საინტერესო დებატები, ჯანსაღი კრიტიკა, ოპონირება, რაც ყველაზე მთავარია ის კონკრეტული შედეგები, რომელიც მისცემს ჩვენს მოსახლეობას კიდევ უფრო დიდ იმედს და რწმენისა, რომ ჩვენ ნამდვილად გავხდებით ევროკავშირის წევრი ქვეყანა, ნატოს წევრი ქვეყანა და ვიქნებით სამაგალითო არა მხოლოდ რეგიონში," - განაცხადა კუჭავამ.

დღევანდელ სხდომაზე კახა კუჭავა პარლამენტის თავმჯდომარედ 86 ხმით აირჩიეს.