"ლელოს" ერთ-ერთმა ლიდერმა დავით უსუფაშვილმა ნიკა მელიას გათავისუფლების მექანიზმებზე ისაუბრა და განაცხადა, რომ ამნისტიის კანონზე მსჯელობა კიდევ ერთხელ მოხდება. მისივე თქმით, მნიშვნელოვანია ოპოზიციამ საერთაშორისო საზოგადოებას დაანახოს, რომ ქვეყნის კრიზისიდან გამოყვანის შესაძლებლობა აქვს. უსუფაშვილის განცხადებით, პარლამენტში იმიტომ არ შევიდა ოპოზიცია, რომ შემდგომში ისევ ბოიკოტის რეჟიმს დაუბრუნდეს:

„ამის მექანიზმად ჩვენ გვაქვს წარმატება ადგილობრივ არჩევნებში. ადგილობრივ არჩევნებში წარმატებას ამ საქმეების მოგვარება სჭირდება. ახლა, რაც იქნება უმოკლესი და ყველაზე ეფექტური გზა, ჩვენ იმ ნაბიჯებს გადავდგამთ. მაგალითად, გიორგი რურუასთან დაკავშირებით ასეთი უმოკლესი გზა შეთანხმებულია პრეზიდენტის შეწყალება. ამიტომ მოვედით დღეს, გავივლით რეგისტრაციას, რათა ჩვენი მხრიდან ჩვენი ვალდებულება შევასრულოთ და ამით ნაბიჯი წინ გადავდგათ. ამნისტიის საკითხებს რაც შეეხება, ამაზე მსჯელობა იქნება. გუშინ იყო სიახლე, როდესაც ნიკა მელიამ განაცხადა, რომ ახლა ის თანახმაა იმ ტიპის გირაოზე, რაზეც თავის დროზე ევროპელები იყვენენ თანახმა. ჩვენ ახლა უნდა გავარკვიოთ, ევროპელები ისევ მზად არიან ამისთვის თუ არა და ამ პროცესის კვალობაზე ჩვენ მივიღებთ ისეთ ზომებს, ეს იქნება ამნისტიით თუ ამნისტიის გარეშე, რომელიც შედეგამდე მიგვიყვანს. ჩვენ აქ იმისათვის არ მოვედით, რომ მალევე ისევ დავუბრუნდეთ ბოიკოტს. მოვედით იმიტომ, რომ ვიბრძოლოთ, ვიშრომოთ, კოლეგები დავარწმუნოთ, საერთაშორისო საზოგადოება ჩავრთოთ იმისათვის, რომ ქვეყანა კრიზისიდან ამოვიყვანოთ. ამიტომ, მე არ ვფიქრობ იმაზე, თუ რამ შეიძლება დაგვაბრუნოს ბოიკოტზე“, - განაცხადა უსუფაშვილმა.