ექვსთვიანი ბოიკოტის შემდეგ მიშელის დოკუმენტზე ხელმომწერი ოპოზიციის ნაწილი დღეს პირველად მივიდა პარლამენტში, თუმცა, მათ შენობაში შესვლა აქციისა და შეძახილების ფონზე მოუწიათ.

ოპოზიციის ერთობლივი განცხადებისას „სტრატეგია აღმაშენებლის“ ლიდერმა გიორგი ვაშაძემ პოლიტიკური კრიზისის შესახებ ისაუბრა და განაცხადა, რომ ოპოზიციის შესვლა პარლამენტში ვითარების გამოსწორებისკენ გადადგმული ნაბიჯია, თუმცა, კრიზისი მაშინ აღმოიფხვრება საბოლოოდ, როდესაც პოლიტპატიმრები გათავისუფლებიან და პარლამენტი საკონსტიტუციო ცვლილებებს მიიღებს:

„ჩემი აზრით, დღეს არის ძალიან მნიშვნელოვანი დღე, ჩვენ ერთი დიდი ნაბიჯი გადავდგით პოლიტიკური კრიზისის აღმოფხვრისკენ, მაგრამ პოლიტიკური კრიზისი არ არის დასრულებული ქვეყანაში. პოლიტიკური კრიზისი დასრულდება მაშინ, როცა პოლიტპატიმრები იქნებიან თავისუფალი, პოლიტიკური კრიზისი დასრულდება მაშინ, როცა ყველა ეს კანონი, რაც მისაღებია, საკონსტიტუციო ცვლილებები, ორგანული კანონი, იქნება მიღებული და რაც მთავარია, ოქტომბერში საქართველოში ტარდება რეფერენდუმი, ამ რეფენდუმით საქართველოს მოქალაქეები, შეთანხმების შესაბამისად, გადაწყვეტენ 2020 წლის არჩევნები იყო ლეგიტიმური, თუ არალეგიტიმური, უნდა ჩატარდეს თუ არა რიგგარეშე არჩევნები და უნდა შეიცვალოს თუ არა ხელისუფლება ქვეყანაში. ამ რეფერენდუმზე თითოეული მოქალაქე მოვა და ის საკუთარი ხმით გადაწყვეტს, მას უნდა ახალი თაობის განვითარება ქვეყანაში თუ იმ ჭაობში ყოფნა, რომელშიც დღეს ჩვენ ვართ. მე გულწრფელად მინდა ვთქვა, ეს არის ღირსეული დოკუმენტი ჩვენი ქვეყნისთვის. დიდი მადლობა ევროპელ და დასავლელ პარტნიორებს, რაც მთავარია, წინ უზარმაზარი რთული დღეები გველის, ბრძოლა საპარლამენტო დისკუსიების დროს. რა თქმა უნდა, „ქართული ოცნება“ მარტივად არ განახორციელებს ყველა ცვლილებას, მაგრამ აქ წარმოდგენილი ადამიანები, ჩვენ ყველანი მზად ვართ, ჩვენი დასავლელი პარტნიორების სრული მხარდაჭერით და რაც მთავარია ქართველი ხალხის სრული მხარდაჭრით, ვაიძულოთ „ქართული ოცნება“, შესრულდეს ყველა პუნქტი ამ შეთანხმებაში. მე მჯერა, რომ საქართველო აუცილებლად გაიმარჯვებს,“- განაცხადა ვაშაძემ.