ექვსთვიანი ბოიკოტის შემდეგ მიშელის დოკუმენტზე ხელმომწერი ოპოზიციის ნაწილი დღეს პირველად მივიდა პარლამენტში, თუმცა, მათ შენობაში შესვლა აქციისა და შეძახილების ფონზე მოუწიათ.

პარლამენტის დეპუტატის სალომე სამადაშვილის განცხადებით, დღეს მნიშვნელოვანი დღეა, რადგან ქვეყნის პოლიტიკურ ისტორიაში გადაიშლება ახალი ფურცელი. მან ასევე იმედი გამოთქვა, რომ დღესვე გათავისუფლდება გიორგი რურუა, უახლოეს დღეებშ კი ნიკა მელიას გათავისუფლება მოხდება:

„დღეს ჩვენი ქვეყნის ისტორიაში გადაიშლება ახალი ფურცელი იმ შეთანხმების იმპლემენტაციის დაწყებით, რომელიც მიღწეული იქნა ევროპული საბჭოს პრეზიდენტის, შარლ მიშელის უშუალო თანამონაწილეობით. ჩვენს ქვეყანაში ჩვენ უნდა დავასრულოთ პოლიტიკური ნიშნით დევნა, პოლიტიკური ნიშნით განხორციელებული მართლმსაჯულება, უნდა აღვუდგინოთ ქართველ ხალს უფლება, რომ თავად აირჩიოს საკუთარი ხელისუფლება სამართლიანი და თავისუფალი არჩევნების გზით და ეს შეთანხმება, რომელსაც ჩვენ ხელი მოვაწრეთ და რომლის განსახირციელებლადაც მოვედით საკანონმდებლო ორგანოში, ეს შეთანხმება არის მართლაც გზა საქართველოს ევროპული მომავლისკენ. ჩვენ დიდი იმედი გვაქვს, რომ შეთანხმების როგორც ყველა პუნქტი, ასევე, მისი სულისკვეთება არ დაირღვევა საქართველოს ხელისუფლების მხრიდან.

მე მინდა ასევე, გამოვთქვა იმედი, კონკრეტულად დღეს ჩვენ უკვე ვნახავთ ერთი პოლიტპატიმრის, გიორგი რურუას გათავისუფლებას და უახლოეს დღეებში იმედი მაქვს, რომა სევე ვნახავთ გათავისუფლებულ ნიკა მელიას, რაც შესაძლებლობას მისცეს სრულ ოპოზიციურ სპექტრს, ხელი მოაწეროს ამ შეთანხმებას" - განაცხადა სამადაშვილმა.