ოკუპანტების პროვოკაცია და შეხვედრა ერგნეთში - ე.წ. ნეიტრალურ ზონაში განთავსებულ კარავში შეხვედრის მონაწილეები იკრიბებიან

პოლიტიკა - 11:02, 27 Apr, 2021

876

ამ წუთებში, ინციდენტების პრევენციისა და მათზე რეაგირების მექანიზმის სამუშაო ჯგუფის 99-ე შეხვედრა იწყება ერგნეთში. "ნიუპოსტის" კორესპონდენტის ცნობით, ე.წ. ნეიტრალურ ზონაში განთავსებულ კარავში შეხვედრის მონაწილეები იკრიბებიან. მოლაპარაკებების დაწყებამდე კომენტარი საქართველოს ცენტრალური ხელისუფლების წარმომადგენელმა, ირაკლი ანთაძემ გააკეთა, რომელიც ამბობს რომ მიმდინარე ოკუპაციას გააპროტესტებენ და მოითხოვენ უკანონო ტყვეების გათავისუფლებას. საოკუპაციო რეჟიმის ტყვეობაში საქართველოს 3 მოქალაქე რჩება:
"რამდენიმე წუთში დაიწყება ინციდენტების პრევენციისა და მათზე რეაგირების მექანიზმის სამუშაო ჯგუფის 99-ე შეხვედრა. მთავარი საკითხი, რა თქმა უნდა, არის უკანონო პატიმრობაში მყოფი ჩვენი თანამოქალაქეები, ასევე ბოლო პერიოდში გააქტიურებული უკანონო ბორდერიზაციის საკითხი, რაც უკიდურეს საფრთხეს უქმნის საოკუპაციო ხაზის გასვწვრივ მცხოვრები ადგილობრივი მოსახლეობის უსაფრთხოებას.

ამ ეტაპზე, დეტალებზე მიჭირს საუბარი, თუმცა, ამის შესაძლებლობა გვექნება შეხვედრის დასრულების შემდეგ. ჩვენი გზავნილები და ჩვენი მოლოდინები არის მხოლოდ ერთი - უკანონო პატიმრობაში მყოფი ყველა ჩვენი თანამოქალაქე რაც შეიძლება შემჭიდროებულ ვადებში დაბრუნდნენ საკუთარ ოჯახებში, გამოყენებული იქნას ჰუმანური მიდგომა და ასევე უკანონო ბორდერიზაციის კონტექსტში შეწყდეს ყველა ის უკანონო აქტივობა, რაც საფრთეს უქმნის ჩვენი თანამოქალაქეების უსაფრთხოებას.
გვიახლოვდება აღდგომის დღესასწაული და საოკუპაციო ხაზის ორივე მხარეს მცხოვრები ადამიანები აღნიშნავენ ამ დღესასწაულს, გვაქვს მოლოდინი და გვსურს დავსვათ საკითხი, რომ ამ დღეებშიც მაქსიმალურად იქნას დაცული ადგილობრვი მოსახლეობის უსაფრთხოება" - განაცხადა ირაკლი ანთაძემ.