"ერთი სული აქვს "ქართულ ოცნებას", რომ ეს შეთანხმება ჩაიშალოს. ამიტომ, ოპოზიციის მხრიდან ხელშეკრულებიდან ნებისმიერი გამოსვლა, შეიძლება "ქართულმა ოცნებამ“ ხელშეკრულების ჩასაშლელად გამოიყენოს" , - აცხადებს "ლელოს“ ლიდერი, ბადრი ჯაფარიძე "ნაცონალური მოძრაობის“ თავმჯდომარის ნიკა მელიას განცხადებაზე, რომლის მიხედვითაც , ამნისტიის კანონპროექტის გაწვევის შემთხვევაში, მზად არის, ევროკავშირის მხრიდან გირაოს გადახდას დათანხმდეს.

მისივე განმარტებით, ეს თემა მედიატორებმა უნდა შეცვალონ, რადგან ამნისტიის შესახებ კანონპროექტი შეთანხმების დოკუმენტში სწორედ მათ შეიტანეს.

"ამიტომ, მთავარი არის მედიატორების მიერ იყოს ეს თემა შეცვლილი ისე, როგორც მელია ითხოვს. თუ ეს მოხდება, ჩვენ ცალსახად მხარს დავუჭერთ.

ჩვენ ამნისტიის მოთხოვნა არ შეგვიტანია შეთანხმებაში, ჩვენ ვითხოვდით ნიკა მელიას დაუყოვნებლივ, უპირობო გათავისუფლებას. ასე, რომ ეს ჩვენი მოთხოვნა არასდროს ყოფილა, არც შეგვიტანია. შესაბამისად, ეს არის მედიატორის მიერ მომზადებული დოკუმენტი ამიტომ, ის უნდა შეიცვალოს მედიატორის მიერ. რა თქმა უნდა, ჩვენთვის მთავრია ნიკა მელიას მოთხოვნა, თუ როგორ აღიქვამს ის იმიტომ, რომ მის გათავისუფლებას ემსხურებოდა ამ ხელშეკრულებაზე ხელის მოწერა. ერთ-ერთი ამოცანა მისი გათავისუფლება იყო, მაგრამ მინდა ხაზი გავუსვა, რომ ამნისტიის მუხლი არ იყო ჩვენი მოთხოვნა. შესაბამისად, რაც ჩვენ არ შეგვიტანია, იმას ვერ გამოვიწვევთ“,-განაცხადა ჯაფარიძემ.