სუს-ის უფროსის მოადგილემ ალექსი ბატიაშვილმა პარლამენტში ყოველწლიური ანგარიში წარადგინა. ძირითადი საკითხები უწყების მუშაობასა და რუსულ აგენტურას ეხებოდა, რომლის მიხედვითაც, სხვა ქვეყნის წარმომადგენლები საქართველოში მიმდინარე პოლიტიკურ პროცესებში ჩარევასა და მართვას ცდილობდნენ.

"მოქალაქეების" ლიდერი ალეკო ელისაშვილი ანგარიშს სკეპტიკურად უყურებს. ელისაშვილის განმარტებით, მან არ იცის, კონტრდაზვერვის სამსახური მუშაობს თუ არა და საერთოდ თუ მიდის რუსული აგენტურის წინააღმედგ ბრძოლა, რადგან საჯაროდ ჯერ არც ერთი რუსი ჯაშუში არ გამოაშკარავებულა:

„მე, როგორც ერთ მოქალაქეს, ერთ დეპუტატს ჩვენს სპეცსამსახურთან მაქვს ის პრეტენზია, რომ არ ვიცი საერთოდ კონტრდაზვერვითი საქმიანობა მიმდინარეობს თუ არა. ამ ანგარიშში კი წერია, რომ იქ 12 სისხლის სამართლის საქმე აღიძრა და ა.შ, მაგრამ საერთოდ ვებრძვით კი რუსულ აგენტურას საქართველოში? ვხედავთ, რომ ჩეხეთიდან 63 რუსი გააძევეს, მათ დიდ ნაწილს ჯაშუშობის ბრალი წარუდგინეს, იტალიის არმიაში აღმოაჩინეს აგენტები, ბულგარეთიდან გააძევეს დეპუტატები და აგენტები და ჩვენთან საჯაროდ არცერთი რუსი ჯაშუში არ გამოაშკარავებულა. როგორ ვახერხებთ ამას?! დარწმუნებული ვარ, ალბათ, დუღს საქართველო რუსეთის აგენტურით. ასე მიჩუმათებულად და ჩუმად კი არ უნდა მოქმედებდეს, რომ 12 საქმე აღვძარი და ზრდილობიანი ფორმა, არამედ გამოაშკარავებული უნდა იყოს მთელი ეს ქსელი. სულ მცირე, როცა ადამიანები ციხეში სხედან, მაგალითად, ვაჟკაცი ბიჭი ზაზა გახელაძე და ვერაფრით ვახერხებთ მის გამოხსნას, თუ აქ აგენტს გამოვააშკარავებდით, გავცვლიდით მაინც ჩვენს მოქალაქეში და ვაჟკაც ბიჭში. ეს კითხვა მექნება ყოველთვის, სანამ საქართველო არ მოიქცევა ისე ღირსეულად, როგორც ჩეხეთი იქცევა, როცა ასე ღიად დაუპირისპირდა რუსეთს. არ ვამბობ, რომ რუსეთს ომი უნდა გამოვუცხადოთ, მაგრამ ვინც ქვეყანას ძირს უთხრის და რუსეთის აგენტურა ამითაა დაკავებული, ვამხილოთ მაინც, ვაჩვენოთ მაინც ხალხს, რომ ესენი არიან მავნებლები ან გამოვიყენოთ მაინც იმ ინსტრუმენტად, რომ ჩვენი დატყვევებული მოქალაქეები გამოვიხსნათ.

მე, როგორც ერთ დეპუტატსა და მოქალაქეს, მგონია რომ ამ მიმართულებით არაფერი კეთდება, არადა, როცა ხელისგულზეა, რომ დათარეშობენ, რუსეთის აგენტურა დათარეშობს ქართულ პოლიტიკურ სივრცეში და არამხოლოდ პოლიტიკურ სივრცეში. არგუმენტები გასაგებია, მაგრამ ქმედება უფრო გასაგებია ჩემთვის. სახელმწიფოსა და სპეცსამსახურისგან თავმოყვარე საქციელი იქნებოდა, რომ გამოაშკარავებული იყოს რაღაც ნაწილი მაინც იმ აგენტურის, რომელიც ამ ქვეყანას ძირს უთხრის და ანგრევს“, - განაცხადა ელისაშვილმა.