პარლამენტში სუს-ის უფროსის მოადგილე ალექსი ბატიაშვილი ყოველწლიური მოხსენებით წარსდგა. ანგარიშის ფარგლებში, ბატიაშვილმა საქართველოში ტერორიზმის მხარდაჭერაზე ისაუბრა და განაცხადა, რომ სახელმწიფო უსაფრთხოების სამსახურმა ასეთ პირთა რაოდენობა მინიმუმამდე დაიყვანა:

„ტერორიზმის მხარდამჭერ პირთა აქტივობებისთვის საქართველო ხელსაყრელ ლოკაციას არ წარმოადგენს. უკანასკნელი წლების მსგავსად, 2020 წელს არ გამოვლენილა სირიასა და ერაყში საქართველოს მოქალაქეთა, საბრძოლო მოქმედებებში მონაწილეობის მიღების მიზნით, გამგზავრების არც ერთი ფაქტი.

გასულ წელს ტერორისტული იდეოლოგიის შესაძლო მხარდამჭერ უცხო ქვეყნის რამდენიმე მოქალაქეს, შესაბამის უწყებებთან კოორდინირებით გატარებული ღონისძიებების შედეგად, საქართველოს ტერიტორიის დატოვება მოუხდა. ზემოაღნიშნულის მიუხედავად, რა თქმა უნდა, არსებობს გარკვეული გამოწვევები“ - აღნიშნა სუს-ის უფროსის პირველმა მოადგილემ.