ევროპარლამენტის საგარეო ურთიერთობათა კომიტეტის თავმჯდომარემ დევიდ მაკალისტერმა „ლელოს“ ლიდერებთან შეხვედრის შემდეგ მხარეებს შორის დადებულ შეთანხმებასა და მისი პუნქტების შესრულებაზე ისაუბრა და განაცხადა, რომ აღნიშნული დოკუმენტი საქართველოს წინსვლის გზაა და კრიზისის გადასაჭერად საუკეთესო საშუალება. მისი თქმით, ევროპარლამენტი მზად არის, საქართველოს ამ პროცესში მხარი დაუჭიროს:

"ჩვენ ახლა გვაქვს შეთანხმება, რომელიც ჯერ ფურცელზეა ამობეჭდილი. ჩვენ ძალიან დიდი ყურადღებით დავაკვირდებით ყველა პუნქტის შესრულებას. სიტყვებზე მეტად მოქმედებაა მნიშვნელოვანი. მოვუწოდებ ყველა პოლიტიკურ ძალას და ინდივიდუალურ წევრებს ხელი მოაწერნ დოკუმენტს. ეს დოკუმენტი არის საქართველოს წინსვლის გზა კრიზისის გადასაჭრელად. გვქონდა მსჯელობა ნიკა მელიას გათავისუფლების გზებზე და „ლელოს“ ინიციატივაზე, თუმცა ამ ეტაპზე ამ თემას არ შევეხები. ნიკა მელია თავად თამაშობს მნიშვნელოვან როლს ამ პროცესში. არ მინდა დეტალებში ჩართვა. ევროპული საბჭოს პრეზიდენტმა ძალიან სწორად აღნიშნა, როდესაც განაცხადა, რომ ეს არ არის დასასრული, ეს არი დასაწყისი და ახლა მთავარი მისი შესრულებაა. აუცილებელია რეფორმების გაგრძელება. ევროპარლამენტი მზადაა საქართველოში ამ პროცესის მხარდასაჭერად.

საქართველოში შემოდგომაზე დაგეგმილი თვითმმართველობის არჩევნებს დიდი მნიშვნელობა ექნება. როგორც წესი, ევროპარლამენტი თვითმმართველობის არჩევნებს არ აკვირდება, მაგრამ ვითვალისწინებთ ამ არჩევნების განსაკუთრებულ დატვირთვას და ჩვენ შესაძლოა, განვიხილოთ, როგორ ვიქნებით ჩართული დაკვირვების პროცესში. საქართველოში ახალგაზრდა დემოკრატიაა. ვიცით, ეს დიდი გამოწვევაა, მაგრამ პოზიტიურად ვარ განწყობილი", - განაცხადა მაკალისტერმა.