მოძრაობა "საქართველოსთვის" მოუწოდებს პოლიტიკურ პარტიებს, რომლებმაც შეთანხმების დოკუმენტს ხელი მოაწერეს, დაარეგისტრირონ დოკუმენტი საყოველთაო ამნისტიაზე, რომლის მიხედვითაც გათავისუფლდებიან პოლიტიკური პატიმრები და სამოქალაქო აქტივისტებზე დევნა შეწყდება.

როგორც მოძრაობის წევრმა ალექსანდრე მილორავამ განაცხადა, მათთვის მიუღებელია 20 ივნისის ამნისტიის ინიცირება, რადგან ის პასუხისმგებლობისგან ათავისუფლებს იმ ადამიანებს, ვისაც ბრალი მიუძღვით 20 ივნისის აქციის დარბევაში:

„ჩვენ მოვუწოდებთ იმ პოლიტიკურ პარტიებს, რომლებმაც ხელის მოაწერეს შეთანხმებას, რომ სამშაბათს დაარეგისტრირონ დოკუმენტი საყოველთაო პოლიტიკურ ამნისტიაზე, რაც ხელს შეუწყობს ყველა პოლიტიკური პატიმრის გათავისუფლებას, სამოქალაქო აქტივისტებზე პოლიტიკური დევნის შეწყვეტას და იმ ადამიანების საქართველოში დაბრუნებას, ვინც პოლიტიკური ნიშნით ვერ ახერხებენ ჩამოსვლას. აქვე მინდა მოვუწოდო „ლელო საქართველოსთვის“ თავმჯდომარეს, მამუკა ხაზარაძეს, რომელიც დღეს ბრიუსელში იმყოფება და ყოველთვის ამბობს იმას, რომ მნიშვნელოვანია ეროვნული შეთანხმება, მხარი დაუჭიროს ამ შემოთავაზებას, წარუდგინოს ის შარლ მიშელს და სწორედ ამ ნაბიჯით დაიწყოს ეროვნული შერიგებისკენ მიმავალი გზა“, - განაცხადა ალექსანდრე მილორავა.