არსებობს მექანიზმები, რომლის საშუალებითაც ნიკა მელიას გათავისუფლებაა შესაძლებელი ისე, რომ არც გირაო გადაიხადოს და არც 20 ივნისის ამნისტიის კანონის მიღება გახდეს საჭირო.

"საქართველოს დემოკრატიული ინიციატივის" მრჩეველის, გიორგი მშვენიერაძის განცხადებით, ხელისუფლებას შეუძლია აღკვეთის ღონისძიება შეცვალოს ან გამოძიება შეწყვიტოს, თუმცა ამ ვარიანტებს არ განიხილავს:

"პირველი ეს არის, რაც შეთანხმებაშია მოცემული, ამნისტია, რომელსაც გარკვეული პროცედურები სჭირდება, მაგრამ ამის გარდა, არის სხვა საშუალებებიც, რომლის გამოყენებაც ხელისუფლებას შეუძლია, მათ შორის მის მიერ კონტროლირებადი სახელმწიფო ინსტიტუტების მეშვეობით. ეს არის თუნდაც აღკვეთის ღონისძიების შეცვლა, პატიმრობის გაუქმება. ასევე შეუძლია, საერთოდ შეწყვიტოს სისხლის სამართლის საქმე, თუ კი ეს მის ინტერესებში შედის.

სამწუხაროდ, რასაც ვხედავთ, ამის საწინააღმდეგოდ იქცევა ხელისუფლება", - განაცხადა მშვენიერაძემ.