ნიკა მელიას ადვოკატის გიორგი კონდახაშვილის განცხადებით, ხელისუფლება ცდილობს ოპოზიციის ლიდერს მის ღირსებებზე ათქმევინოს უარი, ღირსებებზე გააკეთებინოს კომპრომისი, თუმცა მელია კომპრომიზე წასვლას არ აპირებს.

კონდახაშვილის თქმით, ხელისუფლებას მისი გათავისუფლება ყველანაირი წინაპირობების გარეშე მოუწევს:

„ნიკა მელია ამ ბრძოლაში შევიდა გაცნობიერებულად და მის მიერ გამოსასყიდზე უარის თქმა, ეს მისი ახირება არ არის. ეს არის ბრძოლის აქტი უსამართლობის წინააღმდეგ და არავის უნდა ჰქონდეს ილუზია, რომ მელია კომპრომისზე წავა ღირსებისა და იმ მოქალაქეების თავისუფლების ხარჯზე, ვინც ყველაფერი ჩადეს ამ ქვეყნის საუკეთესო ხვალინდელი დღისთვის.

ნიკა მელია, იქნება ხვალ, ერთი კვირის, თუ ერთი თვის შემდეგ, დატოვებს სასჯელაღსრულების დაწესებულებას თავაწეული და ხელისუფლებას მოუწევს წინაპირობების და ყოველგვარი გამოსასყიდის გარეშე მისი გათავისუფლება. რაც შეეხება ამნისტიის კანონს, ნიკა მელიას პოზიცია საჯაროდ ცნობილია, რომ მისთვის მიუღებელია ამნისტიის კანონის იმდაგვარი განმარტება, რომ თავისუფლებისთვის მებრძოლი პატრიოტები და ისინი, ვინც ახალგაზრდებს თვალები დათხარეს, ერთ პლათფორმაში იყვნენ განხილული, თუმცა რა სამართლებრივ ინსტრუმენტს აირჩევს ხელისუფლება ეს მათი გადასაწყვეტია. მელიას პოზიცია ამის შესახებ საჯაროდაა ცნობილი“, - განაცხადა კონდახიშვილმა.