ედპ-ის მთავარი კომიტეტის დადგენილება შარლ მიშელის შეთანხმების დოკუმენტზე ხელმოწერასთან დაკავშირებით

პოლიტიკა - 15:35, 20 Apr, 2021

2082

ეროვნულ-დემოკრატიული პარტიის მთავარი კომიტეტი ამერიკის შეერთებული შტატებისა და ევროკავშირის ჩართულობის შედეგად შექმნილი შეთანხმების დოკუმენტის ხელმოწერასთან დაკაშირებით დადგენილებას ავრცელებს.

"სტრატეგიული მოკავშირების - ამერიკის შეერთებული შტატებისა და ევროკავშირის ჩართულობის შედეგად, ქვეყანაში შექმნილია ახალი პოლიტიკური მოცემულობა. დოკუმენტი, რომელიც ევროკავშირის მედიაციის შედეგად შემუშავდა და რომელსაც ხელი მოაწერა ოპოზიციური პარტიებისა და ხელისუფლების წარმომადგენლებმა, მკაფიოდ არის დაფიქსირებული, რომ ქვეყანაში არსებული პოლიტიკური კრიზისი გამოწვეულია გაყალბებული არჩევნების შედეგად.

გარდა ამისა, დოკუმენტში ხაზგასმითაა საუბარი პოლიტიკურ დევნასა და პოლიტპატიმრების გათავისუფლების აუცილებლობაზე, რის გარანტორადაც დგებიან ჩვენი დასავლელი პარტნიორები.დოკუმენტი შესაძლებლობას იძლევა, ადგილობრივი არჩევნების მექანიზმების გამოყენებით უზრუნველყოფილი იქნას პოლიტიკური კრიზისი წყარო - გაყალბებული არჩევნების შედეგად არჩეული პარლამენტის ლეგიტიმაციის ხარისხის ამაღლება და ქვეყანაში ვადამდელი საპარლამენტო არჩევნების ჩატარება.

აქედან გამომდინარე მიზანშეწონილად მივიჩნევთ, ეროვნულ-დემოკრატიული პარტიის თავმჯდომარემ, ბაჩუკი ქარდავამ ხელი მოაწეროს დოკუმენტს და შეწყვიტოს პარლამენტის ბოიკოტის რეჟიმი მხოლოდ მას შემდეგ, რაც საპატიმროს დატოვებენ პოლიტპატიმრები, ხოლო ნიკა მელიას მიეცემა საშუალება, პირადად დააფიქსიროს მთავარი ოპოზიციური პარტიის სახელით, აღნიშნულ დოკუმენტზე ხელმოწერა“ - ნათქვამია, ეროვნულ-დემოკრატიული პარტიის მთავარი კომიტეტის დადგენილებაში, რომელიც ცოტა ხნის წინ პარტიის პრესსამსახურის მიერ იქნა გავრცელებული.