ენმ-ს თავმჯდომარე ნიკა მელია საპატიმროდან ევროპული საბჭოს პრეზიდენტის შარლ მიშელის მიერ წარმოდგენილ დოკუმენტს ეხმაურება და აცხადებს, რომ დოკუმენტში შესული ამნისტიის საკითხი და მის შედეგად მოპოვებული თავისუფლების შედეგი იქნება შეწყალებული მოძალადე თანამდებობის პირები და პოლიციელები. როგორც მელია ციხიდან წერს, ამ გარიგებაში არ მიიღებს მონაწილეობას:

"მოკლედ მინდა გითხრათ ჩემი მოსაზრება:

რა გამოდის - ძალმომრეობას იმიტომ არ შევეგუე, უკანონობას იმიტომ არ დავემორჩილე და უსამართლობაზე იმიტომ არ დავხუჭე თვალი, რომ მერე ჩემი თავისუფლებისთვის ვინმეს ან მე გირაოდ გასაღებული გამოსასყიდი გადაგვეხადა. ეს ჩემთვის მიუღებელია!

ჯერ პატიმრობა შემიფარდეს და მერე ჩემი თავისუფლებით დიაწყეს ვაჭრობა. ამ გზით მოპოვებული "თავისუფლების" შედეგი რა იქნება - შეწყალებული მოძალადე თანამდებობის პირები და პოლიციელები.

და თან იმ ფონზე, რომ ქვეყნისთვის აუცილებელი პოლიტიკური მიზანი მიუღწეველია და კრიზისის რეალური დაძლევის გზა არ იკვეთება.

მე ამ გარიგებაში ვერ და არ შევალ! ეს ჩემი შეუვალი პოზიციაა.

ოცნებამ კარგად იცის, როგორ იკეტება ციხის კარი და ასევე მშვენივრად შეუძლია მისი გაღება" - წერს ნიკა მელია.