„ნაციონალური მოძრაობის“ გენერალური მდივნის ვანო მერაბიშვილის მეუღლე ტაკო მერაბიშვილი 12 დეკემბერს ვანო მერაბიშვილისა და ზურაბ ჭიაბერაშვილის სასამართლო პროცესზე ერთერთი მოწმის მიერ მერაბიშვილისა და ჭიაბერაშვილის წინააღმდეგ მიცემულ ჩვენებას ეხმიანება:

„მიუხედავად იმისა, რომ მოწმე სულამანიძე კარგად დამუშავებული ყავდა პროკურატურას და თავად ბატონ ნაცვლიშვილს, მან განაცხადა რომ უკანონო დავალება არ მიუღია არც მერაბიშვილისგან და არც ჭიაბერაშვილოსგან.

სულამანიძემ განაცხადა, რომ მან პირადად მიიღო დავალება ვანოსგან რასაც ვანო უარყოფს. ეს ადამიანი არასოდეს არ ყოფილა ვანოს დაქვემდებარების ქვეშ და არც განსაკუთრებული მეგობრული ან რაიმე სხვა სახის ურთიერთობა ჰქონია მასთან, რაც სულამანიძემაც დაადასტურა.

მოკლედ, მეგობრებო, ნაცლიშვილი თავად შეხვდა ამ ადამიანს და რომ არ მოეფერებოდა ამაში ალბათ ეჭვი არავის გეპარებათ. თავის გადასარჩენად რას არ იზამს ადამიანი“, – წერს თაკო მერაბიშვილი.

შეგახსენებთ, რომ რამაზ სულამანიძე დასაქმების სოციალური მომსახურების სააგენტოს ყოფილი ხელმძღვანელია, ამჟამად კი თბილისის საბავშვო ბაღების სააგენტოს ხელმძღვანელია. 12 დეკემბრის პროცესზე მან განაცხადა, რომ წინასაარჩევნოდ დასაქმდა 21 ათასი მოქალაქე, მათი პოლიტიკური აქტივობების მიხედვით.

სულამანიძის განმარტებით, დასასაქმებელთა სიას გუბერნატორებისგან იღებდა, ხოლო პროცესთან დაკავშირებით დავალებებს მერაბიშვილი და ჭიაბერაშვილი აწვდიდნენ.

მისი განცხადებითვე, ის ოთხჯერ იმყოფებოდა პროკურატურაში და მეხუთედ ლაშა ნაცვლიშვილს შეხვდა, რომლისგანაც მიიღო დაპირება, რომ მასზე სისხლის სამართლებრივი დევნა არ განხორციელდებოდა.